لیہ : دریائے  سندھ کے کٹاؤ میں شدت، سیلاب کے خدشے کے باعث علاقہ مکین نقل مکانی پر مجبور 

لیہ : جنوبی پنجاب کے علاقے لیہ کے نواحی علاقوں میں دریائے  سندھ کا کٹاؤ شدت اختیار کر گیا۔ 
تفصیلات کے مطابق بستی راکھواں کے قریب دریائے سندھ کے بڑھتے کٹاؤ کی بدولت دریا سے ملحقہ اراضی دریا برد ہونے کا خطرہ ہے۔ 
بدقسمتی سے نشیبی بستیوں کے مکینوں کو کوئی حکومتی مدد حاصل نہیں ہے۔ دریائے سندھ کے علاقہ مکین اپنی مدد آپ کے تحت محفوظ مقامات پر نقل مکانی کرنے پر مجبور ہیں۔ 
ہر سال جنوبی پنجاب میں مؤثر اقدام نہ ہونے کی بدولت دریائی کٹاؤ اور سیلاب سے قیمتی اراضی دریا برد ہو جاتی ہے، جس سے فصلوں کے ساتھ ساتھ مال مویشی کا بھی نقصان ہوتا ہے۔ 2010 کے خوفناک سیلاب کے دوران جنوبی پنجاب کے بیشتر اضلاع میں سیلاب نے بڑے پیمانے پر جانی و مالی نقصان کیا۔ سیلاب کے دوران نہ صرف لوگ بے گھر ہوئے بلکہ قیمتی اراضی پر کھڑی فصلوں اور مویشیوں کے ثمرات سے بھی ہاتھ دھونے پڑے۔ 
دریائے سندھ کے کناروں پر دریائی کٹاؤ کو روکنے کے لیے دریائی حدود کے کمزور پشتوں کو مضبوط کرنے کے ساتھ ساتھ کناروں پرشجر کاری کے لیے مناسب منصوبہ بندی کی ضرورت ہے، تا کہ جنوبی پنجاب کے مکینوں کو مون سون کے دوران سیلاب کے ممکنہ خطرات سے بچایا جا سکے۔