پاکستانی کرکٹ ٹیم کی ٹی ٹوئنٹی ورلڈ کپ کارکردگی کا جائزہ،محسن نقوی کی جانب سے اہم فیصلے متوقع 

چیئر مین پی سی بی محسن نقوی نے پاکستان کرکٹ ٹیم کے کوچز سے ملاقات کی اور پاکستان کرکٹ ٹیم کی ورلڈ کپ میں کارکردگی اور مستقبل کی حکمت عملی کے بارے میں اہم گفتگو کی۔ 
چیئرمین پاکستان کرکٹ بورڈ محسن نقوی نے پاکستان کرکٹ ٹیم کے ہیڈ کوچز گیری کرسٹن اور جیسن گلیسپی، جبکہ  اسٹنٹ کوچ اظہر محمود سے بھی ملاقات کی۔ 
ذرائع کے مطابق ملاقات میں پاکستان کرکٹ ٹیم کی ورلڈ کپ 2024 میں دکھائی گئی خراب کارکردگی اور اس کے عوامل پر بات کی گئی۔ 
پاکستانی کرکٹ ٹیم کے کوچز نے ٹیم کی کارکردگی کو بہتر بنانے کے لیے چیئر مین پی سی بی کو اپنی آرا دیں۔ چیئر مین محسن نقوی نے ٹیم کی کارکردگی کو بہتر بنانے کے لیے کرکٹ ٹیم کے کوچز سے ایک جامع پلان طلب کر لیا۔ 
کوچز اور چیئرمین نے اس بات سے اتفاق کیا کہ ٹیم میں کھلاڑیوں کی شمولیت کے حوالے سے کھلاڑیوں کی فٹنس کو خصوصی ترجیح دی جائے۔
چیئرمین پی سی بی نے پاکستان کرکٹ ٹیم کے کوچز کی کارکردگی پر اطمینان کا اظہار کیا۔ 
چیئر مین پی سی بی محسن نقوی نے میڈیا سے بات کرتے ہوئے بتایا کہ کپتان بابر اعظم کی کپتانی کے بارے میں ابھی کوئی فیصلہ نہیں لیا گیا۔