لاہور :پولیس اور ڈاکوؤں کے درمیان فائرنگ کا تبادلہ،اے ایس آئی شہید

لاہور: شہر کے علاقے سندر میں پولیس اور ڈاکوؤں کے مابین فائرنگ کا تبادلہ ہوا جس کے نتیجے میں ایک اے ایس آئی شہید ہو گئے۔ 

پولیس کے مطابق، آرگنائزڈ کرائم یونٹ کی ایک ٹیم جب ڈاکوؤں کو گرفتار کرنے کے لیے ایک مکان پر چھاپہ مار رہی تھی کہ اچانک ڈاکوؤں نے پولیس پر فائرنگ شروع کر دی۔ جوابی کارروائی میں پولیس اہلکار اے ایس آئی نذیر شہید ہو گئے۔ 

اس واقعے کی اطلاع ملتے ہی لاہور کے ڈی آئی جی آپریشنز فیصل کامران موقع پر پہنچے اور انہوں نے مفرور ڈاکوؤں کی گرفتاری کے لیے خصوصی ٹیمیں تشکیل دیں۔ پولیس نے علاقے کو گھیرے میں لے لیا ہے اور سی سی ٹی وی فوٹیج کی مدد سے ڈاکوؤں کی تلاش جاری ہے۔

ڈی آئی جی آپریشنز نے یقین دلایا کہ پولیس تمام وسائل بروئے کار لا کر مفرور ڈاکوؤں کو جلد از جلد گرفتار کر لے گی۔ انہوں نے شہید اے ایس آئی کو خراج تحسین پیش کرتے ہوئے کہا کہ ان کی قربانی رائیگاں نہیں جائے گی۔