سعودی عرب نے مساجد میں نماز جنازہ پڑھانے کی اجازت دیدی

سعودی وزارت مذہبی امور نے بدھ کے روز ایک سرکلر جاری کیا جس میں طویل وقفے کے بعد مساجد میں نماز جنازہ کی اجازت دی گئی۔کورونا وائرس کی وجہ سے نماز جنازہ مساجد میں پڑھانے پر پابندی عائد کی گئی تھی۔ پابندی کے دوران نماز جنازہ قبرستانوں  کے کھلے میدانوں میں ادا کی جاتی تھی۔

سرکلر پبلک ہیلتھ اتھارٹی کی سفارش کے مطابق جاری کیا گیا ہے  جس کے تحت  سخت حفاظتی اقدامات کے تحت ملک بھر کی مساجد میں  نماز جنازہ ادا کرنے کی اجازت دی  گئی ہے۔

سرکلر میں یہ شرط عائد کی گئی  ہے کہ  مساجد اور نماز ہالوں میں نماز جنازہ مندرجہ ذیل قواعد کے مطابق ہونی چاہئے۔

ا) مسجد کے متعدد دروازے ہونے چاہئیں جو نماز کے دوران  استعمال کیے جائیں  جبکہ ایک دروازہ   جنازہ  لے جانے کے لئے وقف ہوگا ، صرف جاں بحق افراد کے لواحقین کو ہی وہ دروازہ استعمال کرنے کی اجازت ہو گی ۔

ب)  لواحقین  اور    تعزیت کا اظہار کرنے والے  زائرین   کے مابین  رکاوٹ لگائی جانی چاہئے ، جس سے دو میٹر کی حفاظت کا فاصلہ یقینی ہو۔

ج) سپروائزر کو مسجد میں تفویض کیا جانا چاہئے تاکہ اس بات کو یقینی بنایا جاسکے کہ نماز جنازہ پڑھنے والے تمام افراد حفاظتی اقدامات پر عمل پیرا ہیں۔

د) نماز جنازہ باقاعدگی سے نماز کے وقت سے کم از کم ایک گھنٹہ قبل ادا کی جانی چاہئے۔

رپورٹ کے مطابق ، وزارت کی ہدایت میں کہا گیا ہے کہ وزارت بلدیہ و دیہی امور اور وزارت ہاؤسنگ  باہمی رابطہ قائم کریں تاکہ  یقین دہانی کرائی جا سکے کہ ایک مسجد میں ایک ساتھ ہونے والے جنازوں کی تعداد تین سے زیادہ نہ ہو۔