موسیٰ خیل میں 23 مسافروں کو گاڑیوں سے اتار کر قتل کر دیا گیا

موسیٰ خیل کے علاقے راڑہ شم میں 23 مسافروں کو گاڑیوں سے اتار کر قتل کر دیا گیا۔

ایس ایس پی موسیٰ خیل ایوب اچکزئی کے مطابق تمام افراد کو ٹرکوں اور مسافر بسوں سے اتار کر فائرنگ کر کے قتل کیا گیا، مسلح افراد نے بین الصوبائی شاہراہ پر ناکہ لگاکر مسافروں کو بسوں سے اتارا۔

ایس ایس پی کے مطابق مسلح افراد نے 10 گاڑیوں کو بھی آگ لگادی، پولیس، لیویز موقع پر پہنچ کر لاشوں کو اسپتال منتقل کر دیا گیا ہے۔

پولیس حکام کا کہنا ہے کہ واقعے کی مزید تحقیقات کا آغاز بھی کر دیا گیا ہے۔

وزیراعلیٰ بلوچستان میر سرفراز بگٹی نے موسیٰ خیل کے قریب دہشت گردی کے واقعے کی شدید مذمت کرتے ہوئے جاں بحق ہونے والوں کے اہل خانہ سے دلی تعزیت کا اظہار کیا ہے۔

سرفراز بگٹی نے کہا کہ دہشت گرد اور سہولت کار عبرتناک انجام سے بچ نہیں سکیں گے اور حکومت ان کا پیچھا کرے گی۔

وفاقی وزیر داخلہ محسن نقوی نے بھی دہشت گردی کے بدترین واقعہ کی شدید مذمت کرتے ہوئے بزدلانہ کارروائی میں جاں بحق ہونے والوں کے لواحقین سے دلی ہمدردی اور تعزیت کا اظہار کیا۔

وفاقی وزیر داخلہ نے کہا کہ موسیٰ خیل کے قریب دہشت گردوں نے معصوم لوگوں کو نشانہ بنا کر ظلم کا مظاہرہ کیا، درندگی اور ظلم کی انتہا ہے۔

انہوں نے کہا کہ دہشت گرد اور سہولت کار عبرتناک انجام سے نہیں بچ سکیں گے۔ دہشت گردی کے خلاف جنگ میں سکیورٹی فورسز کے ساتھ زندگی کے ہر شعبے نے لازوال قربانیاں دی ہیں۔