جو بائیڈن کا ایران پر پابندیاں ہٹانے سے صاف انکار

بین الاقوامی میڈیا رپورٹس کے مطابق کے مطابق اسرائیل کے مؤقر اخبار ہیرٹز نے امریکی نشریاتی ادارے سی بی ایس کو دیے جانے والے ایک انٹرویو کے حوالے سے بتایا ہے کہ جوبائیڈن نے کہا کہ امریکہ ایران پر عائد پابندیاں صرف اس لیے ختم نہیں کرے گا کہ اسے مذاکرات کی میز پر لایا جاسکے۔ان کا کہنا تھا کہ مذاکرات کی میز پر ایران کو لانے کا مقصد یہ ہے کہ ماضی میں ہونے والی ڈیل پر ازسر نو بات چیت کی جائے۔سی بی ایس کی جانب سے جب یہ استفسار کیا گیا کہ کیا بات چیت کے لیے ممکن ہے کہ امریکہ عائد پابندیاں پہلے ختم کردے؟ تو انہوں نے صاف الفاظ میں منع کردیا۔

ایک ایسے وقت میں جب امریکی صدر جوبائیڈن نے مذاکرات کی میز تک ایران کو لانے کے لیے اس پر عائد معاشی پابندیاں ختم کرنے سے انکار کردیا ہے تو ایران کے سپریم لیڈر آیت اللہ خامنہ ای نے ایرانی ایئر فورس کمانڈرز سے خطاب میں کہا ہے کہ امریکہ اگر ایران سے جوہری معاہدے کی پاسداری چاہتا ہے تو اس کے لیے ضروری ہے کہ وہ ایران پر عائد پابندیاں عملی طور پر ختم کرے۔

ایران کے سپریم لیڈر آیت اللہ خامنہ ای نے اس ضمن میں واضح طور پر کہا کہ  امریکہ کی جانب سے عائد پابندیوں کے ختم ہونے تک ایران جوہری معاہدے پر دوبارہ عمل پیرا نہیں ہوگا۔ ان کا کہنا تھا کہ ایران کو عملاً پابندیاں ختم کرنا ہوں گی۔