کرم : فریقین کا غیرمعینہ مدت تک سیز فائر پر اتفاق

خیبر پختونخوا کے ضلع کرم میں فریقین نے غیرمعینہ مدت تک سیز فائر پر اتفاق کرلیا

کمشنرکوہاٹ ڈویژن معتصم باللہ شاہ کی سربراہی میں ضلع کرم میں پائیدار امن کے لیےگرینڈ جرگہ ہوا، جس میں فریقین کے 100 سے زیادہ  افراد  نےگرینڈ  جرگے میں  شرکت کی۔

کمشنر کوہاٹ کے مطابق دونوں قبائل کے عمائدین نے ضلع کرم میں غیرمعینہ مدت تک سیز فائرپر اتفاق کیا ہے۔

فریقین نے عہد کیا کہ لڑائی جھگڑے کسی مسئلے کا حل نہیں، عشروں پر محیط مسئلے کے مستقل حل کے لیے وقت ضرور درکار ہوگا تاہم اس کے لیے دونوں جانب سے اخلاص کی ضرورت ہوگی۔

فریقین نے یہ بھی عہد کیا کہ اپنے بچوں کے روشن مستقبل اور علاقے کے امن کی خاطر ضلع کرم میں مکمل اورپائیدار امن کے قیام تک بیٹھے رہیں گے اوریہاں سے امن کا پیغام لے کر اپنے علاقوں کو جائیں گے۔

کمشنر کوہاٹ کا کہنا ہے کہ فریقین نے پائیدار امن کے قیام تک ساتھ بیٹھے رہنے کا عزم کیا ہے، حکومتی عملداری یقینی بنائی جائے گی۔

 دوسری جانب صورت حال میں بہتری کے بعد انٹرنیٹ اور موبائل سروس بحال کر دی گئی۔ جبکہ  پشاور، پارا چنار شاہراہ سمیت آمد و رفت کے تمام راستے تاحال بند ہیں۔ راستوں کی بندش کے باعث اشیائے خور و نوش، ادویات اور پیٹرول کی شدید قلت کا سامنا ہے۔

 علاقے کے عمائدین نے بتایا کہ سڑکوں کی بندش کی وجہ سے شہر میں اشیاء ضروریہ کی شدید قلت کا سامنا ہے۔ بارڈر حکام نے بھی تصدیق کی کہ پاک افغان خرلاچی بارڈر پر بھی آمد و رفت اور تجارت متاثر ہو رہی ہے۔ 

واضح رہے کہ چند روز قبل پاراچنار میں پیش آنے والے فائرنگ کے واقعات کے بعد حالات کشیدہ ہو گئے تھے اور اس کے بعد فریقین کے درمیان مسلح جھڑپیں شروئی ہوئیں تھی جس میں 130 کے قریب افراد جان کی بازی ہار گئے تھے۔