محکمہ موسمیات کی جنوری کے پہلے ہفتے میں بارشوں کی پیش گوئی

محکمہ موسمیات نے جنوری کے پہلے ہفتے میں ملک کے بیشتر حصوں میں بارش اور بالائی علاقوں میں برفباری کی پیش گوئی کی ہے۔محکمہ موسمیات کے مطابق جنوری میں ہونے والی بارشوں کے بعد ملک میں جاری سردی کی لہر میں شدت کا امکان ہے۔
 محکمہ موسمیات نےیکم سے پانچ جنوری کے دوران دیر، سوات، شانگلہ اور مہند میں بارش اور برفباری متوقع ہے۔ مری اور گلیات میں بھی وقفے وقفے سے برفباری کا امکان ظاہر کیا گیا ہے،اسی طرح دوسے 6 جنوری تک اسلام آباد، پوٹھوہار، سرگودھا اور سینٹرل پنجاب کے مختلف شہروں میں بارش متوقع ہے جبکہ جنوبی پنجاب میں دو سے 5 جنوری کے دوران وقفے وقفے سے بارش ہو سکتی ہے۔
بلوچستان میں یکم سے 4 جنوری تک چمن، پشین، قلعہ عبداللہ، چاغی، نوشکی، قلات اور ہرنائی میں بارش اور برفباری کا امکان ہے۔ بالائی سندھ میں 3 سے 4 جنوری تک بارش کی توقع ہے۔
دوسری جانب محکمہ موسمیات نے خبردار کیا ہے کہ برفباری کے باعث ملک کے بالائی علاقوں میں راستوں کی بندش کا اندیشہ ہے جبکہ بارشوں کے بعد میدانی علاقوں میں دھند بڑھنے کا امکان بھی ظاہر کیا گیا ہے۔ بارشوں اور برفباری کے بعد ملک بھر میں سردی کی لہر آنے کی توقع ہے۔