صوبائی حکومت کا نگران دور میں بھرتی ہونے والے سرکاری ملازمین کو نکالنے کا فیصلہ

پشاور:خیبرپختونخواصوبائی حکومت نے نگران دور میں بھرتی  کیے جانے والے سرکاری ملازمین کو فارغ کرنے کا فیصلہ کر لیا۔
ذرائع کے مطابق خیبرپختونخوا حکومت نے نگران دور میں بھرتی ہونیوالے سرکاری اہلکاروں کو نکالنے کیلئے قانون تیار کر لیا گیا، خیبر پختونخوا ملازمین (سروسز سے ہٹانا)بل 2025ء اسمبلی ایجنڈے میں شامل تھا۔
بل کے متن میں کہا گیا کہ نگران حکومت کے دوران غیر قانونی طور پر بھرتیاں کی گئی تھیں، متعلقہ ادارے اس ضمن میں بل پاس ہونے پر نوٹیفیکیشن جاری کریں گے۔
اس بل کا اطلاق 22جنوری 2023ء سے 29فروری 2024ء کے دوران ہونیوالی بھرتیوں پر ہوگا، جبکہ اس بل کے تحت بچوں اور اقلیتی کوٹہ کے ساتھ ساتھ پبلک سروس کمیشن کے ذریعے ہونیوالی بھرتیوں کو استثنیٰ حاصل ہوگا۔
مجوزہ بل کے مطابق نگران دور کے ملازمین کو نکالنے میں حائل رکاوٹیں دور کرنے کیلئے کمیٹی تشکیل دی جائے گی، 7رکنی کمیٹی کی سربراہی سیکرٹری اسٹیبلشمنٹ کریں گے،جبکہ ، کمیٹی میں ایڈووکیٹ جنرل، لاء سمیت محکمہ خزانہ، انتظامیہ اور دیگر متعلقہ اداروں کے سیکرٹریز شامل ہوں گے۔
ملازمین کے حوالے سے کمیٹی کا فیصلہ حتمی ہوگا، تمام ادارے نگران دور کی بھرتیوں کے حوالے سے 30 دن میں رپورٹ مرتب کریں گے۔
صوبائی حکومت کی جانب سے پیش کیے جانے واکلے اس بل کا مقصد حکومت کے وسیع تر مفاد میں نگران دور کی بھرتیوں کو غیرقانونی قراردینا ہے۔