کم وقت میں قذافی اسٹیڈیم کی تکمیل، دنیائے کرکٹ کا منفرد ریکارڈ پی سی بی کے نام

لاہور: پاکستان کرکٹ بورڈ (پی سی بی)نے کم وقت میں اسٹیڈیم کی تکمیل کر کے دنیائے کرکٹ میں منفرد ریکارڈ قائم کردیا۔
پاکستان کرکٹ بورڈ کی جانب سے صرف  110 روز میں قذافی اسٹیڈیم لاہور کی 99 فیصد تکمیل کو دنیائے کرکٹ کا منفرد ریکارڈ قرار دیا گیا ہے۔

چیئرمین پی سی بی محسن نقوی علی الصبح قذافی اسٹیڈیم پہنچ گئے جہاں انہوں نے مختلف فلورز اور ہاسپٹلٹی باکسز کے فنشنگ ورک کا معائنہ کیا۔ 
چیئرمین محسن نقوی نے باکسز کے سامنے لگائی ریلنگ کے معیار کو چیک کیا اور باکسز کے باہر لگائی نشتوں پر بیٹھ کر گراؤنڈ کے ویو کا جائزہ لیا۔
چیف آپریٹنگ آفیسر سمیر احمد نے فنشنگ ورک پر پیش رفت کے بارے بریفنگ دی۔
اس موقع پر گفتگو کرتے ہوئے چیئرمین پی سی بی محسن نقوی کا کہنا تھا کہ فنشنگ ورک میں معیار کو ہر صورت یقینی بنایا جائے، قذافی سٹیڈیم تکمیل کے قریب ہے۔
محسن نقوی نے کہا کہ قذافی اسٹیڈیم کا افتتاح 7 فروری کووزیر اعظم محمد شہباز شریف کریں گے۔
تزئین و آرائش کے بعد 24 ہزار نشستوں والے قذافی اسٹیڈیم میں مزید 10 ہزار شائقین کے بیٹھنے کی گنجائش بنی ہے اور اب 34 ہزار سے زائد شائقین بیک وقت گراؤنڈ میں میچ سے لطف اندوز ہوں گے۔