بیشتر شہروں میں آج سے گرمی بڑھنے کا امکان، ہیٹ ویوالرٹ جاری

محکمہ موسمیات نے ملک کے بیشتر شہروں میں آج سے گرمی بڑھنے کا امکان ظاہر کیا ہے۔

محکمہ موسمیات کی جانب سے ہیٹ ویوالرٹ جاری کیا گیا ہے جس کے مطابق آج سے 18 اپریل کے دوران دن کا درجہ حرارت معمول سے 06 سے 08 ڈگری سینٹی گریڈ زیادہ رہنے کا امکان ہے۔

لاہور سمیت پنجاب کے مختلف شہروں میں آج سے گرمی کی شدید لہر شروع ہونے کا امکان ہے۔ محکمہ موسمیات نے آئندہ تین روز کے دوران خشک اور شدید گرم موسم کی پیشگوئی کی ہے۔ اس حوالے سے صوبائی ڈیزاسٹر مینجمنٹ اتھارٹی (پی ڈی ایم اے) نے بھی الرٹ جاری کرتے ہوئے شہریوں کو احتیاطی تدابیر اپنانے کی ہدایت کی ہے۔

پی ڈی ایم اے کے مطابق جنوبی پنجاب میں درجہ حرارت معمول سے چھ سے آٹھ ڈگری سینٹی گریڈ زیادہ رہنے کا امکان ہے، جبکہ بالائی پنجاب میں کل سے لے کر 18 اپریل تک گرمی کی شدت میں غیر معمولی اضافہ متوقع ہے۔ ادارے نے خبردار کیا ہے کہ اس دوران گرد آلود ہواؤں اور آندھی کے طوفان کا بھی خطرہ موجود ہے۔

ادھر کراچی سمیت سندھ کے کئی علاقوں میں بھی گرم ہوائیں چلنے لگی ہیں۔ محکمہ موسمیات کے مطابق سندھ کے بیشتر شہروں میں آئندہ دنوں میں درجہ حرارت 46 سے 48 ڈگری سینٹی گریڈ تک پہنچنے کا امکان ہے، جس سے گرمی کی شدت میں مزید اضافہ ہو جائے گا۔

موسمیات نے بتایا کہ گزشتہ روز ملک میں سب سے زیادہ درجہ حرارت نواب شاہ ، حیدرآباد اور دادو میں 43 ڈگری سینٹی گریڈ ،کراچی 39 ، ڈی آئی خان 37، لاہور،  پشاور 35 اوراسلام آباد میں 33 ڈگری ریکارڈ کیا گیا۔