ٹک ٹاک بنانے کا جنون،2 طالبات ٹرین کی زد میں آ کر جاں بحق

حیدرآباد:ٹک ٹاک کے جنون نے ایک بار پھر 2 قیمتی جانیں لے لیں،صوبہ سندھ کے شہر حیدر آباد میں ٹک ٹاک بناتے ہوے ٹرین کی زد میں آکر 2 طالبات جاں بحق ہو گئیں۔
تفصیلات کے مطابق یہ افسوسناک واقعہ ضلع حیدر آباد کے علاقے آٹوبھان روڈ پر واقع بابن شاہ ریلوے ٹریک پراس وقت پیش آیا، جب دونوں طالبات، جو ایک نجی انسٹی ٹیوٹ میں زیر تعلیم تھیں، ریلوے ٹریک پر چڑھ کر ٹک ٹاک ویڈیو بنا رہی تھیں۔
پولیس کے مطابق جاں بحق ہونے والی طالبات کی شناخت 22 سالہ سونی دختر کشن لعل اور 25 سالہ رشنا دختر محمد قاسم کے نام سے ہوئی ہے، دونوں طالبات کا تعلق گاؤں وانکی وسی سے بتایا گیا ہے۔
حادثے کے فوراً بعد پولیس نے موقع پر پہنچ کر لاشیں تحویل میں لے کر اسپتال منتقل کیں،پولیس کی جانب سے مزید تفتیش جاری ہے.
دوسری جانب واقعے کے بعد شہری حلقوں نے سوشل میڈیا کے محفوظ اور ذمے دارانہ استعمال پر زور دیا ہے تاکہ اس قسم کے افسوسناک واقعات سے بچا جا سکے۔