غیر منقولہ جائیداد کا کم تخمینہ لگنے والوں کیلئے خوشخبری، بل پنجاب اسمبلی میں پیش

لاہور:پنجاب حکومت نے غیر منقولہ جائیداد کے کم تخمینے کی شکایات کا نوٹس لیتے ہوئے اسٹامپ ڈیوٹی ایکٹ 1899 میں اہم ترمیم کرنے کا فیصلہ کر لیا ہے۔
تفصیلات کے مطابق اس حوالے سے ”دی اسٹامپ ڈیوٹی ترمیمی ایکٹ 2025“ کے نام سے بل پنجاب اسمبلی میں پیش کر دیا گیا ہے، جو اب متعلقہ قائمہ کمیٹی کے سپرد کر دیا گیا ہے،کمیٹی دو ماہ میں اس پر رپورٹ پیش کرے گی۔
پیش کردہ ترمیمی بل میں تجویز دی گئی ہے کہ اگر کسی غیر منقولہ جائیداد کا تخمینہ کم لگے تو شہری کمشنر کے پاس اپیل کر سکیں گے، جس کے بعد کمشنر کو اپیل موصول ہونے کے 15 دن کے اندر فیصلہ دینا ہوگا۔
اس سے قبل صرف زیادہ تخمینہ لگنے پر ہی اپیل کی جا سکتی تھی، جبکہ کم تخمینہ ہونے کی صورت میں کوئی قانونی راستہ موجود نہیں تھا،ڈسٹرکٹ کلیکٹر کی غلطی سے متاثرہ شہریوں کو انصاف ملنے کا نیا موقع ملے گا۔
بل میں غیر استعمال شدہ اسٹامپ پیپرز کی ری فنڈ کا نظام بھی تجویز کیا گیا ہے۔اگر شہری دو سال تک اسٹامپ پیپر استعمال نہ کریں، یا ملک سے باہر ہوں، جیل میں ہوں یا اسٹامپ ڈیوٹی ان کے قبضے میں نہ ہو، تو وہ ریفنڈ حاصل کر سکیں گے۔
یہ مجوزہ ترامیم شہریوں کو ریلیف دینے، کرپشن کے امکانات کم کرنے اور اسٹامپ ڈیوٹی نظام میں شفافیت لانے کی کوششوں کا حصہ قرار دی جا رہی ہیں۔