پی ایس ایل10،قلندرز اورگلیڈی ایٹرز کا میچ بارش کے باعث ڈرا،1،1پوائنٹ مل گیا

 پی ایس ایل کے دسویں ایڈیشن میں لاہور قلندرز اور کوئٹہ گلیڈی ایٹرز کے درمیان میچ کو بارش کے باعث روک دیا گیا جو دوبارہ شروع نہ ہوسکا اور دونوں ٹیموں کو ایک ایک پوائنٹ مل گیا۔

لاہور کے قذافی اسٹیڈیم میں کھیلے گئے میچ میں لاہور قلندرز نے 11.3 اوورز میں 3 وکٹوں کے نقصان پر 111 رنز بنائے تھے جس کے بعد بارش شروع ہوگئی اور میچ روک دیا گیا۔
اس سے قبل، کوئٹہ گلیڈی ایٹرز کے کپتان سعود شکیل نے لاہور قلندرز کے خلاف ٹاس جیت کر فیلڈنگ کرنے کا فیصلہ کیا۔
لاہور قلندرز کی جانب سے فخرزمان اور محمد نعیم نے اننگز کا آغاز کیا لیکن فخرزمان کھاتہ کھولے بغیر ہی پہلے اوور میں پویلین واپس لوٹ گئے۔

تاہم، محمد نعیم اور عبداللہ شفیق نے 102 رنز کی جارحانہ شراکت قائم کی، اس دوران دونوں بلے بازوں نے 29، 29 گیندوں پر نصف سینچریاں اسکور کیں۔

 پوائنٹس ٹیبل پر اسلام آباد یونائیٹڈ 10 پوائنٹس کے ساتھ سرفہرست ہے، لاہور قلندرز 8 پوائنٹس کے ساتھ دوسرے جب کہ کوئٹہ گلیڈی ایٹرز 8 ہی پوائنٹس کے ساتھ تیسرے نمبر پر ہے۔

کوئٹہ گلیڈی ایٹرز نے ٹیم میں ایک تبدیلی کرتے ہوئے محمد عامر کی جگہ محمد ذیشان کو موقع دیا ہے۔لاہور قلندرز نے ٹیم میں کوئی تبدیلی نہیں کی اور گزشتہ روز اسلام آباد یونائیٹڈ کو شکست دینے والی پلینگ الیون کو ہی میدان میں اتارا ہے۔

علاوہ ازیں، کراچی کنگز 8 پوائنٹس کے ساتھ چوتھے، پشاور زلمی 4 پوائنٹس کے ساتھ پانچویں اور ملتان سلطانز صرف 2 پوائنٹس کے ساتھ آخری نمبر پر موجود ہے۔