کراچی:جناح اسپتال میں کانگو وائرس کے مریض کا علاج کرنیوالے 2 ڈاکٹرز میں وائرس کی علامات

شہر قائد کے جناح اسپتال میں کانگو وائرس کے مریض کا علاج کرنے والے 2 ڈاکٹروں میںبھی وائرس کی علامات ظاہر ہوئیں ہیں۔

اسپتال ذرائع کا کہنا ہے کہ جناح اسپتال کے 2 ہاؤس آفیسرز نے گزشتہ ہفتے کانگو کے مریض کو طبی سہولیات فراہم کی تھیں، کانگو کا مریض 19 جون کو دوران علاج سندھ انفیکشن ڈیزیز اسپتال میں انتقال کرگیا تھا۔

دوسری جانب ایگزیکٹیو ڈائریکٹر جناح اسپتال ڈاکٹر شاہد رسول نے بتایا کہ دونوں ڈاکٹروں کو تیزبخار اور پیٹ میں تکلیف کی شکایات ہیں، ایک ہاؤس آفیسر اپنے گھر جب کہ دوسرا جناح اسپتال کے میڈیکل آئی سی یو میں آئیسولیٹ ہے۔

انہوں نے کہا کہ ایک ہاؤس آفیسر میں کانگو وائرس کی 90 فیصد علامات ہیں، دونوں ڈاکٹروں میں مریض کو طبی امداد دینے کے اگلے روز ہی علامات ظاہر ہوگئی تھیں۔

ان کا مزید کہنا تھا کہ دونوں ڈاکٹروں کے پی سی آر ٹیسٹ کے نمونے لیب بھیجے ہیں جن کی کانگو وائرس سے متعلق رپورٹ پیر کو موصول ہوگی۔

انہوں نے کہا کہ اسپتال کے شعبہ ایمرجنسی میں فیور ڈیسک قائم کی ہے، اسپتال میں بڑے پیمانے پرآئیسولیشن یونٹ قائم کرنے کی سہولیات نہیں، آئیسولیشن یونٹ بنانے سے متعلق محکمہ صحت سے آنے والی ہدایات پر عمل کیاجائیگا۔