صہیونی دشمن نے ایک بڑی غلطی اور سنگین جرم کا ارتکاب کیا ہے اسے سزا ملنی چاہیے،ایرانی سپریم لیڈر

تہران:ایران پر اسرائیلی حملوں میں امریکہ کی براہ راست شمولیت کے بعد ایران کے سپریم لیڈر آیت اللّٰہ علی خامنہ ای کا پہلا سخت اور دوٹوک بیان سامنے آ گیا ہے۔

ایرانی سپریم لیڈر نے سماجی رابطے کی ویب سائٹ ’ایکس‘ (سابقہ ٹوئٹر) پرجاری اپنے آفیشل فارسی اکاؤنٹس سے پیغام جاری کیا، جس میں انہوں نے اسرائیل کو "سنگین غلطی" کا ذمہ دار ٹھہراتے ہوئے اسے "سخت سزا" دینے کے عزم کا اظہار کیا ہے۔

آیت اللّٰہ خامنہ ای نے ’آپریشن مڈ نائٹ ہیمر‘ کے تناظر میں لکھا کہ "صہیونی دشمن نے ایک بڑی غلطی اور سنگین جرم کا ارتکاب کیا ہے؛ اسے سزا ملنی چاہیے، اور اب اسے سزا دی جا رہی ہے۔"

خیال رہے کہ ان کا یہ بیان ایسے وقت سامنے آیا ہے جب امریکی صدر ڈونلڈ ٹرمپ نے تصدیق کی ہے کہ امریکہ نے ایران کی تین اہم جوہری تنصیبات فردو، نطنز، اور اصفہان پر فضائی حملے کیے ہیں۔

قبل ازیں اقوام متحدہ میں ایرانی مندوب نے سلامتی کونسل کے ہنگامی اجلاس سے خطاب کرتے ہوئے امریکا کے تمام الزامات بے بنیاد قرار دیتے ہوئے کہا کہ الزامات کی قانون حیثیت نہیں بلکہ سیاسی محرکات ہیں، ان کی کوئی قانونی بنیاد نہیں۔

 اقوام متحدہ میں ایرانی سفیر نے بھی دو ٹوک اعلان میں واضح کیا تھا کہ ایرانی سرزمین پر حملوںکا متناسب ردعمل اور جواب دیا جائے گا جس کا فیصلہ ایرانی مسلح افواج کریں گی۔