قومی ٹیم کا دورہ ویسٹ انڈیز و بنگلہ دیش،شاداب خان اسکواڈ سے باہر

لاہور:  دورہ بنگلہ دیش اور ویسٹ انڈیز کیخلاف سیریز کیلئے قومی ٹی20 ٹیم کا انتخاب حتمی مراحل میں ہے تاہم نائب کپتان کندھے کی انجری کے باعث ٹیم سے باہر ہو گئے ہیں۔

ذرائع کےمطابق لیگ اسپنر شاداب خان فٹنس مسائل کی وجہ سے دستیاب نہیں ہوں گے، شاداب خان کے کندھے میں تکلیف ہے اور ہوسکتا ہے کہ اس کی سرجری کی ضرورت پڑے۔

ذرائع کے مطابق پی سی بی میڈیکل پینل کی مشاورت سے شادا ب خان کی انگلینڈ میں سرجری کرائی جا رہی ہے، سرجری کے بعد شاداب خان کم سے کم دو ماہ کرکٹ نہیں کھیل سکیں گے۔

واضح رہے کہ پاکستان اور بنگلہ دیش کے درمیان ٹی ٹوئنٹی سیریز کا آغاز 20 جولائی سے ہو گا۔بنگلہ دیش کے خلاف سیریز کے لیے قومی ٹیم کا تربیتی کیمپ سات جولائی سے کراچی میں شروع ہوگا۔

پاکستانی ٹیم سولہ جولائی کو ڈھاکہ روانہ ہوگی، جہاں 20،22 اور 24 جولائی کو میچز شیڈول ہیں۔

تاہم ویسٹ انڈیز میں تین ون ڈے میچز ہوں گے یا وہ بھی ٹی20 فارمیٹ میں کھیلے جائیں گے، اس کا فیصلہ ابھی ہونا باقی ہے، پی سی بی سربراہ محسن نقوی کی منظوری سے ممکنہ اسکواڈ کااعلان جلد متوقع ہے۔