شاداب خان کے دائیں کندھے کی کامیاب سرجری، کم از کم 3 ماہ کرکٹ سے دور رہیں گے

پاکستان کرکٹ ٹیم کے نائب کپتان اور تجربہ کار آل راؤنڈر شاداب خان کے دائیں کندھے کی سرجری کامیابی سے مکمل ہو گئی ہے۔

اپنے سوشل میڈیا پیغام میں شاداب خان نے مداحوں کو اطلاع دی کہ ان کی سرجری کامیاب رہی ہے۔ انہوں نے کہا:
"الحمداللہ، میری سرجری کامیاب رہی ہے۔ اب میری توجہ ریکوری اور ری ہیب پر مرکوز ہے۔"

انہوں نے مداحوں سے دعاؤں کی اپیل کرتے ہوئے لکھا:
"آپ سب کی محبت اور حمایت کا شکریہ، جلد صحت یابی کے لیے دعا کریں۔"

ذرائع کے مطابق شاداب خان کم از کم تین ماہ تک میدان سے باہر رہیں گے، اور اسی وجہ سے وہ بنگلا دیش اور ویسٹ انڈیز کے خلاف آئندہ ٹی ٹوئنٹی سیریز میں شرکت نہیں کر سکیں گے۔

یہ پیش رفت ایک ایسے وقت میں سامنے آئی ہے جب قومی ٹیم اگلے ماہ بنگلا دیش کے خلاف تین میچوں کی ٹی ٹوئنٹی سیریز کی تیاریوں میں مصروف ہے۔ امکان ہے کہ اس دورے کے لیے اسکواڈ کا اعلان آئندہ ہفتے کیا جائے گا۔

مزید برآں، شاداب خان کی ستمبر میں ہونے والے ایشیا کپ میں شرکت بھی مشکوک ہو گئی ہے۔

دوسری جانب پاکستان کرکٹ بورڈ (پی سی بی) کی جانب سے شاداب خان کی مکمل صحت یابی کے لیے کوئی باضابطہ ٹائم لائن یا واپسی کی تاریخ جاری نہیں کی گئی ہے۔

یاد رہے کہ شاداب خان حالیہ مہینوں میں متعدد انجری مسائل کا شکار رہے، اور میڈیکل ٹیم کی سفارش پر انہیں کندھے کے علاج کے لیے سرجری کرانا پڑی۔