پشاور : رہائشی مکان میں آگ لگنےسے 4 افراد جاں بحق 

 پشاور: صوبائی دارالحکومت پشاور کے علاقے کوچی بازار میں آگ لگنےسے 4 افراد جاں بحق ہوگئے۔

تفصیلات کے مطابق پشاور کے علاقے کوچی بازار میں واقعہ ایک گھر میں شارٹ سرکٹ کے باعث خوفناک آگ بھڑک اٹھی، جس سے 2 خواتین سمیت 4 افراد جھلس کر جاں بحق ہوگئے، جبکہ 2 کی حالت تشویشناک بتائی گئی ہے، آگ بجھانے کے دوران2 فائر فائٹرز کی بھی حالت غیر ہوگئی، آگ پر قابو پانے کے عمل میں ریسکیو کی 6 گاڑیوں نے حصہ لیا۔

ریسکیو حکام کے مطابق آگ ایک رہائشی مکان میں بھڑکی اور رات گئے محلہ فضل حق کریم جان مارکیٹ میں پھیل گئی، جس میں ایک ہی خاندان کے چار افراد جاں بحق ہو گئے۔

ریسکیو ترجمان کے مطابق اطلاع ملتے ہی ریسکیو ٹیمیں فوری طور پر جائے وقوعہ پر پہنچیں، 6 افراد کو عمارت سے باہر نکالا، آتشزدگی کے دوران 2 ریسکیو اہلکار بے ہوش ہوگئے، جنہیں اسپتال منتقل کر دیا گیا۔

ریسکیو حکام کے مطابق 6 فائر ٹینڈرز اور 40 اہلکاروں نے آگ پر قابو پایا، تنگ گلیوں کی وجہ سے آگ بجھانے میں مشکلات کا سامنا کرنا پڑا، وجہ معلوم نہیں ہو سکی۔