پنجاب میں آئندہ 24گھنٹوں کے دوران شدید بارشوں کا امکان: پی ڈی ایم اے

لاہور: پراونشل ڈیزاسٹر مینجمنٹ اتھارٹی( پی ڈی ایم اے) کی جانب سے آٓئندہ 24 گھنٹوں کے دوران صوبہ پنجاب کے مختلف اضلاع میں شدید بارشوں کا الرٹ جاری کر دیا گیا ہے۔

تفصیلات کے مطابق ترجمان پی ڈی ایم اے عرفان کاٹھیا کا کہنا ہے کہ مون سون بارشوں کا سلسلہ 10جولائی تک متوقع ہےاور آئندہ 24 گھنٹوں میں پنجاب میں شدید مون سون بارشوں کا امکان ہے۔

ترجمان نے شہریوں کو آسمانی بجلی سے محفوظ رہنے،بارش کے دوران گاڑی کی رفتار آہستہ رکھنے اور مناسب فاصلہ رکھنے کی ہدایت کی ہے۔

ان کا مزید کہنا تھا کہ شہری کچے مکانات اورخستہ حال عمارتوں میں رہائش رکھنے سے گریز کریں۔

اس کے علاوہ شہریوں کو ہدایت دی گئی ہے کہ ہنگامی صورتحال میں پی ڈی ایم اے کی ہیلپ لائن 1129 پر رابطہ کریں۔

دوسری جانب ترجمان واسا کے مطابق لاہور میں سب سے زیادہ بارش نشتر ٹاؤن میں 53 ملی میٹر ریکارڈ کی گئی، جیل روڑ 47، قرطبہ چوک 44 اورگلبرگ میں 43 ملی میٹر بارش ریکارڈ کی گئی۔

ترجمان نے بتایا کہ لاہور ائیرپورٹ 47، گلشن راوی 35، اقبال ٹاؤن 33، سمن آباد 28 اورجوہرٹاؤن میں 27 ملی میٹر بارش ریکارڈ کی گئی ہے۔