خواتین کو خودمختار بنانے کے لیے ان پر سرمایہ کاری کی ضرورت ہے: اداکار احسن خان 

پاکستان شوبز انڈسٹری کے کامیاب و معروف اداکار احسن خان نے خواتین کی خود مختاری کی طرف توجہ دینے پر زور دیا۔

حال ہی میں احسن خان نے ایک یو ٹیوب چینل کو انٹرویو دیتے  ہوئے خواتین کی خودمختاری سے متعلق گفتگو کی ۔

ایک سوال کے جواب میں انہوں نے کہا کہ ہم اپنی خواتین کو آگے بڑھانے میں انویسٹ نہیں کرتے، ان کا کہنا تھا کہ عورت کو اتنا خودمختار کیا جائے کے اسے زندگی کا پتا ہو،لیکن ان کے مطابق خودمختار ہونے کا مقصد یہ ہر گز نہیں کہ عورت اصول ،ثقافت یا مذہب چھوڑ دے۔خاتون کوہر چیزکی معلومات ہو گی تو وہ چیزوں کو بہترطریقے سے سمجھ سکے گی۔

انہوں نے مثال دیتے ہوئے کہا کہ بہت سی خواتین ایسی ہیں جن کی شوہر سے علیحدگی ہوچکی ہے یا ان کے شوہر انتقال کرچکے ہیں تو ایسی خواتین کو نہیں معلوم کہ انہوں نے دنیا پر کرنا کیا ہے۔

اپنی بات کی مزید وضاحت کرتے ہوئے انہوں نے کہا کہ بہت سے لوگ اسے ماڈرن بات کی طرف لے جائیں گے لیکن میں کوئی ماڈرن بات نہیں کر رہا، میں ایک مذہبی بات کر رہا ہے اور حضرت خدیجہؓ کی مثال ہمارے سامنے ہے کہ وہ ایک خودمختار خاتون تھیں۔

احسن خان نے مزید کہا کہ ہمیں اپنی زندگی کو کیسے گزارنا ہے، یہ ہم اپنے بہترین لوگوں سے سیکھتے ہیں اور ہمارے لیے بہترین مثالیں یہ (حضرت خدیجہؓ جیسی) ہستیاں ہیں۔