گھوٹکی: ٹک ٹاکر سمیرا راجپوت کی گھر سے لاش برآمد

گھوٹکی: صوبہ سندھ کے ضلع گھوٹکی میںٹک ٹاکر سمیرا راجپوت کی گھر سے پراسرار طور پر لاش ملی ، خاندان نے الزام لگایا ہے کہ سمیرا کو سابق شوہر نے زہر دے کر قتل کیا۔

تفصیلات کے مطابق سندھ کے ضلع گھوٹکی سے دل دہلا دینے والا واقعہ سامنے آیا ہے جہاں ٹک ٹاکر سمیرا راجپوت کی گھر سے پراسرار طور پر لاش برآمد ہوئی ہے۔

ابتدائی اطلاعات کے مطابق سمیرا اپنی رہائش گاہ کے اندر مردہ پائی گئیں تاہم موت کی وجہ معلوم نہ ہوسکی۔

تاہم دوسری جانب ڈپٹی سپرنٹنڈنٹ آف پولیس (ڈی ایس پی) انور شیخ کے مطابق سمیرا کی 15 سالہ بیٹی نے بیان دیا ہے کہ چند افراد زبردستی شادی کیلئے دباؤ ڈال رہے تھے اور میری ماں کو زہر کی گولیاں دے کر قتل کیا گیا۔

خاندان نے الزام لگایا ہے کہ سمیرا کو سابق شوہر نے زہر دے کر قتل کیا تاہم پولیس کا کہنا ہے کہ مقتولہ نے تین سال قبل علی سے طلاق لی تھی ، واقعے تحقیقات جاری ہیں اور سابق شوہر علی کو گرفتار کرلیا ہے۔

پولیس کا کہنا ہے کہ واقعے کا مقدمہ تاحال درج نہیں ہوا، تحقیقات جاری ہیںاور ابھی تک قتل کی وجہ معلوم نہیں ہو سکی۔

پولیس کی جانب سے مزید بتایا گیا کہ خاتون کے جسم پر تشدد کے نشانات نہیں، خاتون کی لاش کو پوسٹ مارٹم کے لیے اسپتال منتقل کر دیا گیا ہے۔