کورونا کی چوتھی لہر سے نمٹنے کیلئے محکمہ صحت پنجاب کی ایک نئی تجویز

تفصیلات کے مطابق تجویز صوبائی وزیر صحت ڈاکٹر یاسمین راشد کی زیر صدارت اجلاس میں پیش کی گئی۔ اجلاس میں چیف سیکرٹری پنجاب، ایڈیشنل چیف سیکرٹری داخلہ، محکمہ صحت کے سیکرٹریز اور اعلیٰ سول و عسکری حکام نے شرکت کی ہے ۔ اجلاس میں تمام ڈویژنل کمشنرز ویڈیو لنک کے ذریعے شریک ہوئے، اجلاس میں صوبے میں کورونا وباء کی صورتحال، ویکسینیشن کی رفتار، ایس او پیز پر عملدرآمد کا جائزہ لیا گیا ہے ۔

محکمہ پرائمری صحت کی لیہ، میانوالی، اوکاڑہ کے ڈی ایچ کیوہسپتالوں میں نئی لیبز قائم کرنے کی تجویز۔ ٹی ایچ کیو کھاریاں (گجرات) اورٹی ایچ کیو واہ (راولپنڈی) میں نئی لیبز کے قیام کی تجویز دی گئی ہے ۔ اجلاس میں چیف سیکرٹری نے  ٹی ایچ کیو ہسپتال واہ کی بجائے اٹک میں بی ایس ایل تھری لیب کے قیام کی تجویز دی ہے ۔

اجلاس میں بریفنگ دیتے ہوئے چیف سیکرٹری پنجاب کا کہنا تھا کہ این سی او سی نے پنجاب کے پانچ بڑے شہروں کی 40فیصد آبادی کی ویکسینیشن اگست تک مکمل کرنے کا  ہدف دیا ہے۔ جن شہروں کا ٹارگٹ دیا گیا ہے ان شہروں میں لاہور، فیصل آباد، گوجرانوالہ، ملتان اور راولپنڈی شامل ہیں ۔

محکمہ پرائمری ہیلتھ اور سپیشلائزڈ ہیلتھ کیئر کے سیکرٹریز نے بھی  اجلاس کو بریفنگ دی ، محکمہ صحت کے افسران کا کہنا تھا کہ گزشتہ 24گھنٹے کے دوران تین لاکھ50ہزار سے زائد افراد کو ویکسین لگائی گئی ہیں ، اس وقت صوبے میں 21لاکھ58ہزارویکسیئن کی خوراکوں کا سٹاک موجود ہے ۔