کاغان: جھیل سیف الملوک روڈ پر کلاؤڈ برسٹ اورتودہ گرنے سے 500 سے زائد سیاح پھنس گئے

ناران : خیبرپختونخوا کے سیاحتی مقام وادی کاغان میں جھیل سیف الملوک کو جانے والی سڑک پر اچانک کلاؤڈ برسٹ کے باعث بڑا تودہ گر گیا، جس کے نتیجے میں 500 سے زائد سیاح پھنس گئے جبکہ 117 سے زائد گاڑیاں بھی پھنس گئیں۔

واقعے کے بعد وزیراعلیٰ خیبرپختونخواعلی امین گنڈا پور نے فوری طور پر ریسکیو آپریشن کی ہدایات جاری کیں، جس پر کاغان ڈویلپمنٹ اتھارٹی نے ہنگامی بنیادوں پر کارروائی کرتے ہوئے تمام سیاحوں کو بحفاظت نکال کر محفوظ مقامات پر منتقل کر دیا۔

دوسری جانب سیکرٹری سیاحت عبدالصمد نے بتایا کہ حکومت خیبرپختونخوا سیاحوں کی حفاظت کو یقینی بنانے کے لیے ہر ممکن اقدامات کر رہی ہے،ان کا کہنا تھا کہ کئی گھنٹوں آپریشن کے بعد ناران میں ٹریفک بحال کرکے تمام پھنسے سیاحوں کو باحفاظت نکال لیا گیا ہے۔

 انہوں نے سیاحوں سے اپیل کی ہے کہ خراب موسم میں ایسے سیاحتی مقامات کا رُخ نہ کریں اور سفر کے دوران کسی بھی ایمرجنسی کی صورت میں ہیلپ لائن 1422 پر فوری رابطہ کریں۔