اداکارہ تمنا بھاٹیا کا انوکھا انکشاف: اپنی تھوک سے کیل مہاسوں کا علاج کرتی ہوں

معروف بھارتی اداکارہ تمنا بھاٹیا، جنہوں نے حالیہ فلم میں گانے "آج کی رات مزہ حسن کا لیجیے" میں اپنی پرفارمنس سے شائقین کے دل جیتے، نے ایک انوکھا خوبصورتی کا نسخہ شیئر کرکے سب کو حیران کر دیا۔

ایک ٹی وی انٹرویو میں تمنا نے انکشاف کیا کہ وہ صبح جاگنے کے فوراً بعد اپنا تھوک چہرے پر لگا کر کیل مہاسوں کا علاج کرتی ہیں، اور یہ طریقہ وہ کئی بار آزما چکی ہیں۔

ان کا کہنا تھا کہ اگرچہ وہ طبی ماہر نہیں ہیں، لیکن وہ جانتی ہیں کہ نیند کے دوران منہ میں موجود بیکٹیریا صبح کے تھوک میں شامل ہوتے ہیں، اور یہی تھوک مہاسوں کے خلاف مؤثر ثابت ہوتا ہے۔ انہوں نے کہا کہ برش کرنے سے پہلے کا تھوک جلد کے لیے فائدہ مند ہو سکتا ہے۔

تمنا بھاٹیا نے مزید بتایا کہ انہوں نے 25 سال کی عمر کے بعد اپنی خوبصورتی اور فٹنس پر بھرپور توجہ دینا شروع کی، اور ہر ایسی روٹین اپنائی جس سے وہ جاذبِ نظر رہیں۔ ان کا مشورہ تھا کہ خواتین کو بھی 25 سال کے بعد اپنی جلد اور فٹنیس پر سنجیدگی سے کام شروع کر دینا چاہیے۔

اداکارہ کے اس حیران کن انکشاف پر نہ صرف شو کے میزبان بلکہ وہاں موجود خواتین بھی دنگ رہ گئیں۔ ویڈیو وائرل ہونے کے بعد سوشل میڈیا صارفین کی جانب سے دلچسپ تبصرے سامنے آئے، جب کہ کئی خواتین نے دعویٰ کیا کہ انہوں نے بھی یہ طریقہ آزمایا ہے اور اس کے نتائج مؤثر ثابت ہوئے ہیں۔