آزاد کشمیر میں مون سون بارشوں کی تباہ کاریاں جاری، جانی و مالی نقصان کی تفصیلات جاری

مظفرآباد: آزاد جموں و کشمیر کے مختلف علاقوں میں جاری مون سون بارشوں نے شدید تباہی مچا دی ہے۔ اسٹیٹ ڈیزاسٹر مینجمنٹ اتھارٹی (ایس ڈی ایم اے) کے مطابق مختلف حادثات میں 3 افراد جاں بحق اور 11 زخمی ہو چکے ہیں، جب کہ کئی املاک کو نقصان پہنچا ہے۔

حادثات کی تفصیلات:

• ضلع سدھنوتی میں ایک نالے میں طغیانی کے باعث ایک خاتون جاں بحق جبکہ ایک شخص زخمی ہوا۔

• جہلم ویلی کے علاقے نڑ دھجیاں میں نالے کے بپھرنے سے تین دکانیں مکمل تباہ ہو گئیں اور ایک گراٹ کو نقصان پہنچا۔

• مچھیارہ میں بھی نالے کی طغیانی کے باعث تین دکانوں کو شدید نقصان پہنچا۔

ایس ڈی ایم اے کے مطابق مون سون بارشوں کے نتیجے میں لینڈ سلائیڈنگ سے چار اضلاع کی متعدد شاہراہیں بند ہو چکی ہیں، جس سے ٹریفک کی روانی متاثر ہوئی ہے اور شہریوں کو شدید مشکلات کا سامنا ہے۔

نقصانات کی رپورٹ جاری

ایس ڈی ایم اے نے یکم جون 2025 سے اب تک ہونے والے نقصانات کی رپورٹ بھی جاری کر دی ہے، جس کے مطابق:

• 3 شہری جاں بحق

• 11 افراد زخمی

• 76 مکانات مکمل تباہ

• 290 مکانات جزوی طور پر متاثر

• 33 دکانیں تباہ

• 14 مویشی ہلاک

اتھارٹی نے خبردار کیا ہے کہ آئندہ دنوں میں مزید بارشوں کی صورت میں ندی نالوں میں طغیانی اور مزید لینڈ سلائیڈنگ کا خدشہ ہے۔ شہریوں کو محتاط رہنے اور متعلقہ اداروں کی ہدایات پر عمل کرنے کی اپیل کی گئی ہے۔