راولا کوٹ اور دریائے نیلم میں دو مختلف حادثات میں 6 افراد جاں بحق

راولا کوٹ اور دریائے نیلم میں گاڑیوں کے حادثات میں 6 افراد جاں بحق ہوگئے۔

پولیس کے مطابق راولا کوٹ میں پونچھ یونیورسٹی کے تراڑ کیمپس کے قریب کار نالے میں بہہ گئی جس کے نتیجے میں پونچھ یونیورسٹی کی خاتون لیکچرار جاں بحق ہوگئیں۔

پولیس کا کہنا ہےکہ لیکچرار کی گاڑی تراڑ کیمپس کے قریب نالے سے گزر رہی تھی کہ گاڑی بند ہوگئی، اس دوران نالے میں زیادہ پانی آنے کی وجہ سے گاڑی بہہ گئی، حادثے میں جاں بحق خاتون گل لالہ کا تعلق راولاکوٹ کے نواحی علاقے کھڑک سے تھا۔

پولیس کا بتانا ہے کہ نالہ تراڑ میں بہہ جانے والی گاڑی میں ڈاکٹر گل لالہ بھی موجود تھیں جن کی تلاش شروع کردی گئی ہے۔

دوسری جانب وادی نیلم میں سیاحوں کی گاڑی کو حادثہ پیش آگیا جس کے نتیجے میں 5 افراد جاں بحق ہوگئے۔

ریسکیو حکام کے مطابق بالائی وادی نیلم شنڈاس کے مقام پر سیاحوں کی گاڑی کو حادثہ پیش آیا جس میں خاتون سمیت 5 افراد زندگی کی بازی ہار گئے، جبکہ کمسن بچی زخمی ہوئی ہے، حادثہ روڈ کی خستہ حالی کے باعث پیش آیا۔

ریسکیو حکام کے مطابق گاڑی میں ڈرائیور سمیت 6 افراد سوار تھے، جاں بحق افراد کو اے ڈی ایس ہلمت منتقل کر دیا گیا۔