دوسرا لڈو کیوں نا دیا؟ بھارتی شہری نے لڈو تنازع پر وزیر اعلی ہیلپ لائن پر شکایت کرا دی 

مدھیہ پردیش کے ضلع بھنڈ میں آزادی کی تقریب میں ایک لڈو کم ملنے پر شہری نے غصے میں آ کر وزیر اعلی ہیلپ لائن پر شکایت درج کرا دی۔ 

بھنڈ:  بھارتی ریاست مدھیہ پردیش کے ضلع بھنڈ میں بھارت کے یوم آزادی کی مناسبت سے گرام پنچایت بھون میں پرچم کشائی کے موقع پرانتظامیہ کی جانب سے شریک ہونے والے افراد کو دو دو لڈو دئیے گئے لیکن کملیش خوشواہا نامی شہری کو صرف ایک لڈو دیا گیا ۔ 

 بھارتی میڈیا کے مطابق کملیش نےاضافی لڈو کا مطالبہ کیا لیکن انکار پر غصے سے وزیر اعلی ہیلپ لائن پر شکایت درج کروا دی۔ 
تحریری شکایت میں کملیش نے مؤقف اختیار کیا کہ مٹھائیوں کی تقسیم منصفانہ انداز میں نہیں کی گئی اور ا س معاملے پر لڈو تقسیم کرنے والوں کے خلاف کارروائی ہونی چاہیے۔ 

بھارتی میڈیا کے مطابق پنچایت کےسیکرٹری نے تصدیق کی کہ شہری باہر سڑک پر کھڑا تھا اور واقعی ایک لڈو پر اصرار کر رہا تھا، انکار پر اس نے شکایت کر ڈالی۔ 

بعد ازاں پنچایت نے معاملہ رفع دفع کرنے کے لیے کملیش کو ایک کلو مٹھائی دینے کا فیصلہ کیا۔