ضمنی انتخابات : پیپلز پارٹی اور مسلم لیگ (ن) کا مشترکہ امیدواروں پر اتفاق

اسلام آباد: پاکستان پیپلز پارٹی (پی پی پی) اور مسلم لیگ (ن) نے ضمنی انتخابات میں مشترکہ حکمتِ عملی کے تحت مل کر حصہ لینے کا فیصلہ کر لیا ہے۔
تفصیلات کے مطابق دونوں جماعتوں کے رہنماؤں نے اعلان کیا ہے کہ جہاں گزشتہ عام انتخابات میں جس جماعت کا امیدوار رنر اپ تھا، وہی امیدوار ضمنی الیکشن میں حصہ لے گا جبکہ دوسری جماعت اسے مکمل طور پر سپورٹ کرے گی۔
پیپلز پارٹی کے سینئر رہنما اور سابق اسپیکر قومی اسمبلی راجہ پرویز اشرف نے میڈیا سے گفتگو میں بتایا کہ مسلم لیگ (ن) کے وفد سے ملاقات میں ضمنی انتخابات سے متعلق تفصیلی مشاورت ہوئی، جس میں باہمی تعاون کے اصول طے پا گئے۔

 انہوں نے کہا کہ یہ فیصلہ دونوں جماعتوں کی اعلیٰ قیادت کی ہدایت پر کیا گیا ہے اور اس سلسلے میں وزیراعظم شہباز شریف کے شکر گزار ہیں۔
دوسری جانب مسلم لیگ (ن) کے رہنما اور وفاقی وزیر ریلوے حنیف عباسی نے کہا کہ دونوں جماعتیں حکومت میں اتحادی ہیں اور ملک بھر کو یہ پیغام دینا چاہتی ہیں کہ ضمنی انتخابات میں بھی ایک دوسرے کا ساتھ دیں گی۔

 انہوں نے مزید کہا کہ یہ اصول طے ہوگیا ہے کہ جہاں جس پارٹی کا رنر اپ امیدوار ہوگا، وہی میدان میں اترے گا اور دوسری جماعت اس کی حمایت کرے گی۔
حنیف عباسی نے اس موقع پر خیبر پختونخوا کے سیلاب متاثرین کے لیے نیک تمناؤں اور دعا کا بھی اظہار کیا۔