امریکی ٹیرف کے بعد بھارتی روپیہ ڈالر کے مقابلے میں تاریخی کم ترین سطح پر پہنچ گیا

امریکا کی جانب سے بھارت پر 50 فیصد تجارتی ٹیرف عائد کیے جانے کے بعد بھارتی روپیہ ڈالر کے مقابلے میں اپنی تاریخ کی کم ترین سطح پر پہنچ گیا ہے۔

بین الاقوامی خبررساں ادارے کے مطابق کاروباری دن کے اختتام پر بھارتی کرنسی 88.19 روپے فی ڈالر پر بند ہوئی، جبکہ دورانِ تجارت یہ سطح مزید گر کر 88.30 تک جا پہنچی۔ اس غیر معمولی گراوٹ کے باعث ماہرین کا خیال ہے کہ بھارتی ریزرو بینک نے مارکیٹ میں ممکنہ مداخلت کی ہے۔

معاشی ماہرین کا کہنا ہے کہ امریکا کی جانب سے بھارتی مصنوعات پر بھاری درآمدی محصولات نہ صرف بھارت کی برآمدات کو متاثر کریں گے بلکہ اقتصادی ترقی کی رفتار میں بھی کمی لائیں گے۔ سرمایہ کاری کا بہاؤ بھی متاثر ہونے کا خدشہ ظاہر کیا جا رہا ہے۔

یاد رہے کہ امریکا نے حالیہ ہفتے بھارتی برآمدات پر مزید 25 فیصد اضافی ٹیکس نافذ کیا ہے، جس کے بعد بھارت پر مجموعی طور پر 50 فیصد تجارتی ٹیرف عائد ہو چکا ہے۔

ماہرین کا اندازہ ہے کہ اگر یہ محصولات ایک سال تک برقرار رہتے ہیں تو بھارت کی مجموعی قومی پیداوار (جی ڈی پی) میں 60 سے 80 بیسس پوائنٹس تک کمی ہو سکتی ہے، جو پہلے سے دباؤ کا شکار معیشت کو مزید کمزور کرے گی۔