خیبر پختونخوا میں مزید2 پولیو کیس رپورٹ ،رواں سال ملک میں مجموعی کیسز کی تعداد 26 ہوگئی

پشاور: خیبر پختونخوا میں دو نئے پولیو کیسز کی تصدیق ہو گئی جس کے بعد راوں سال ملک میں رپورٹ ہونے والے مجموعی کیسز کی تعداد کی 26 ہو گئی۔

نیشنل ایمرجنسی آپریشن سینٹر( این ای او سی) کے مطابق جنوبی خیبر پختونخوا کے اضلاع لکی مروت اور شمالی وزیرستان میں 2 نئے پولیو کیسز کی تصدیق ہوئی ہے۔

نیشنل ای او سی کا کہنا ہے کہ رواں سال پاکستان میں پولیو کے مجموعی کیسز کی تعداد 26 ہو گئی۔

نیشنل ای او سی کے مطابق وائرس کی روک تھام کے لیے جنوبی خیبر پختونخوا میں اعلیٰ معیار کی پولیو مہم جاری ہے،  پولیو مہمات بچوں کو اس لاعلاج بیماری سے محفوظ رکھنے میں مددگار ثابت ہوتی ہیں۔

 نیشنل ای او سی نے بتایا کہ جنوبی خیبرپختونخوا، باجوڑ اور اپر دیر میں آج سے پولیو مہم کا آغازکر دیا گیا ہے۔ 

نیشنل ای او سی نے کہا ہے کہ  رواں ہفتے کی مہم میں 16 لاکھ 85 ہزار سے زائد بچوں کو پولیو سے بچاؤ کے قطرے پلائے جائیں گے۔

خیال رہے کہ ، پولیو ایک لاعلاج بیماری ہے جو عمر بھر کی معذوری کا باعث بن سکتی ہے، ہر مہم میں پانچ سال سے کم عمر تمام بچوں کو پولیو سے بچاؤ کے قطرے لازمی پلائیں۔