چین کا نوجوان سائنسدانوں کے لیے ’K‘ ویزا متعارف کرانے کا اعلان

چین نے سائنس اور ٹیکنالوجی کے نوجوان ماہرین کے لیے نیا ’K‘ ویزا متعارف کروانے کا اعلان کیا ہے۔

غیر ملکی خبر رساں ادارے کے مطابق، یہ ویزا یکم اکتوبر سے نافذ العمل ہوگا، جس کے ذریعے اہل امیدواروں کو داخلے، قیام اور بار بار آمد و رفت میں آسانیاں فراہم کی جائیں گی۔

’K‘ ویزا ہولڈرز تعلیم، ثقافت، سائنس، ٹیکنالوجی اور کاروباری تحقیق میں حصہ لے سکیں گے، اور اس ویزا کے لیے کسی ملکی آجر یا ادارے کے دعوت نامے کی ضرورت نہیں ہوگی۔

چینی حکام کے مطابق یہ اقدام عالمی سائنسی ٹیلنٹ کو اپنی جانب متوجہ کرنے اور بین الاقوامی تعاون کو فروغ دینے کے لیے اٹھایا گیا ہے۔

یاد رہے کہ حال ہی میں امریکی صدر نے ایچ ون بی ورکر ویزا کی سالانہ فیس کو ایک لاکھ ڈالر مقرر کرتے ہوئے اس امیگریشن پروگرام میں سختی کی ہے، اور اس حوالے سے نیا ایگزیکٹو آرڈر بھی نافذ کیا گیا ہے۔

ماہرین کا خیال ہے کہ امریکہ کی اس نئی پالیسی کے بعد ’K‘ ویزا جنوبی ایشیا اور دیگر عالمی ٹیلنٹ کے لیے ایک پرکشش متبادل ثابت ہو سکتا ہے۔