حیدرآباد میں پولیو کا نیا کیس، ملک میں تعداد 27 ہو گئی

نیشنل ایمرجنسی آپریشن سینٹر (این ای او سی) نے سندھ کے ضلع حیدرآباد سے ایک اور پولیو کیس کی تصدیق کی ہے، جس کے بعد رواں سال پاکستان میں پولیو کے کیسز کی مجموعی تعداد 27 ہو گئی ہے۔

این ای او سی کے مطابق، سال 2025 میں اب تک سندھ میں پولیو کے 7 کیسز سامنے آ چکے ہیں۔ پولیو ایک لاعلاج مرض ہے جو عمر بھر معذوری کا باعث بنتا ہے۔

این ای او سی نے والدین سے اپیل کی ہے کہ ہر پولیو مہم میں اپنے بچوں کو پولیو کے قطرے ضرور پلائیں۔ آئندہ ملک گیر پولیو مہم 13 سے 19 اکتوبر تک منعقد ہوگی، جس میں ملک بھر کے 4 لاکھ سے زائد پولیو ورکرز گھر گھر جا کر بچوں کو ویکسین دیں گے۔

این ای او سی نے کہا کہ پولیو مہم کی کامیابی کے لیے والدین، کمیونٹی، اساتذہ، علما کرام اور میڈیا کا کردار انتہائی اہم ہے۔

دوسری جانب، 22 ستمبر 2025 کو شائع ہونے والی ڈان اخبار کی رپورٹ میں انڈیپنڈنٹ مانیٹرنگ بورڈ (آئی ایم بی) نے خبردار کیا ہے کہ پاکستان میں پولیو کے خاتمے کی کوششیں ناکامی کا سامنا کر رہی ہیں۔

آئی ایم بی کی رپورٹ کے مطابق، 37 سال کی محنت اور 22 ارب ڈالر خرچ کرنے کے باوجود پرانے طریقے اب مؤثر ثابت نہیں ہو رہے۔ رپورٹ میں کہا گیا ہے کہ پولیو کے خاتمے کے مشکل مراحل کو عبور کرنے کے لیے نئی حکمت عملی اور ملکوں کی صاف اور مضبوط ذمہ داری ضروری ہے۔

آئی ایم بی کے چیئرمین سر لیام ڈونلڈسن نے عالمی ادارہ صحت کے ڈائریکٹر جنرل ڈاکٹر ٹیڈروس آدانوم گھیبرییسس کو لکھے گئے خط میں کہا کہ ’دی گلاس ماؤنٹین‘ کے عنوان سے یہ رپورٹ ایک اہم موڑ پر پیش کی گئی ہے۔

لیام ڈونلڈسن نے لکھا کہ مسلسل وائرل منتقلی، جغرافیائی سیاسی خلفشار اور مالی پابندیوں نے ایسی صورتحال پیدا کر دی ہے جو پروگرام کی بقاء اور کامیابی کے لیے سنگین چیلنج ہے۔

انہوں نے مزید کہا کہ 2023 میں پرامید آغاز کے باوجود وبا دوبارہ شدت اختیار کر گئی ہے، کیونکہ وائرس کے تاریخی ذخائر بشمول پاکستان اور افغانستان متاثر ہو رہے ہیں۔

آئی ایم بی کا کہنا ہے کہ کامیابی کے لیے نئی سوچ، اداروں کی ہمت، حقیقت پسندانہ حکمت عملی اور ملکوں کی صاف اور واضح ذمہ داری ناگزیر ہے۔