ڈرگ کنٹرول پنجاب کامختلف ادویات کے ناقص بیچز مارکیٹ سے واپس لینے کا حکم

لاہور:ڈرگ کنٹرول پنجاب نے مختلف ادویات کے ناقص بیچز فوری طور پر  مارکیٹ سے واپس لینے کا حکم جاری کردیا جبکہ ڈرگ ٹیسٹنگ لیبارٹری پنجاب کی جانب سے مختلف کمپنیوں کی 18 ادویات کو سب اسٹینڈرڈ قرار دیا گیا۔

تفصیلات کے مطابق ڈرگ کنٹرول پنجاب حکام کا کہنا ہے کہ ریبیز ویکسین کا ایک بیچ سب اسٹینڈرڈ قرار دیا گیا تھا جس کو فوری طور پر ریکال کرنے کی ہدایت کردی گئی۔

اسی طرح ویٹرنری انجیکشن راسومائیسن-ایس، انجیکشن سائیانا فار 50 ملی لیٹر بھی غیر معیاری قرارپایا، جبکہ انجیکشن میٹروسرائز، آنکھوں کی دوا برومائیڈ-ڈی 5 ملی لیٹر بھی سب اسٹینڈرڈ قرار دی گئی ،انجیکشن ایکوا-پی، سیفیٹڈ، ئیورمیکٹ، میٹرو کیور، انفیوژن زولریسٹ بھی سب اسٹینڈرڈ قرار پائی۔

حکام کے مطابق انجیکشن کلیوٹ، فارموپین ایل اے، فلم کوٹیڈ ٹیبلٹ ڈیزی 10 ملی گرام ناقص قرار پائی،انجیکشن الاکن کے دو بیچز،انجیکشن اوریفسٹ-50 بھی سب اسٹینڈرڈ قرار پایا۔

ٹیوب کیتھیٹر بیکاکلیئر، انجیکشن میٹرو م-100 کو بھی ناقص قرار دیا گیا،ڈرگ کنٹرول پنجاب نے تمام کمپنیوں کو فوری طور پر بیچز واپس لینے کا حکم جاری کردیا۔

اس حوالے سے ہیلتھ کیئر پروفیشنلز کو ہدایت کی گئی ہے کہ سب اسٹینڈرڈ بیچز فوری طور پر استعمال سے روک دیے جائیں،ریٹیلرز، فارمیسیز، ڈسٹری بیوٹرز کو ناقص ادویات کا ریکارڈ فوری رپورٹ کرنے کی ہدایت کی گئی ہے۔