ایف بی آر نے انکم ٹیکس ریٹرن فارم سے 'مارکیٹ ویلیو' کا خانہ ختم کر دیا

فیڈرل بورڈ آف ریونیو (ایف بی آر) نے وزیراعظم شہباز شریف کی ہدایت پر انکم ٹیکس ریٹرن فارم 2025 سے ’مارکیٹ ویلیو‘ کا کالم ختم کر دیا ہے۔ اس اقدام کا مقصد ٹیکس دہندگان کے لیے ریٹرن فائلنگ کو آسان اور سہل بنانا ہے۔

ایف بی آر کی جانب سے جاری اعلامیے کے مطابق، ریٹرن فارم سے ’اندازاً مارکیٹ ویلیو‘ کا خانہ حذف کر دیا گیا ہے تاکہ ٹیکس گزاروں پر غیر ضروری بوجھ کم ہو اور فارم کی پیچیدگی میں کمی آئے۔

اس فیصلے کے پس منظر میں وزیراعظم کی ہدایت پر وفاقی وزیر قانون سینیٹر اعظم نذیر تارڑ کی سربراہی میں ایک اعلیٰ سطحی کمیٹی تشکیل دی گئی تھی۔ اس کمیٹی میں وزیر پیٹرولیم، وزیر مملکت برائے خزانہ، اٹارنی جنرل، معاون خصوصی برائے ڈپٹی پرائم منسٹر آفس کوآرڈینیشن، سیکریٹری خزانہ، چیئرمین ایف بی آر اور ممبر کسٹمز شامل تھے۔

کمیٹی نے 26 ستمبر کو اجلاس میں غور و خوض کے بعد سفارش کی کہ مارکیٹ ویلیو کا کالم ختم کر دینا چاہیے۔ وزیراعظم نے ان سفارشات کو منظور کرتے ہوئے ایف بی آر کو فوری عمل درآمد کی ہدایت دی۔

یاد رہے کہ اس سے قبل ایف بی آر نے 25 ستمبر کو ایک وضاحتی بیان میں کہا تھا کہ سوشل میڈیا پر انکم ٹیکس ریٹرن فارم کے حوالے سے پھیلائی جانے والی بعض معلومات غلط ہیں۔ ایف بی آر نے واضح کیا تھا کہ فارم میں کوئی بنیادی تبدیلی نہیں کی گئی۔

ایف بی آر کے مطابق، 7 جولائی 2025 کو جاری کردہ ریٹرن فارم میں صفحہ 66 پر اثاثوں کی مارکیٹ ویلیو کا اندراج لازمی تھا۔ تاہم، گوشواروں کی ابتدائی جانچ سے معلوم ہوا کہ بیشتر افراد اس خانے میں ’صفر‘ لکھ رہے تھے، جس سے مطلوبہ ڈیٹا حاصل نہیں ہو رہا تھا۔

ایف بی آر کا کہنا تھا کہ مارکیٹ ویلیو کا اندراج صرف معاشی تجزیے کے لیے تھا، اور اس کا ٹیکس کی مقدار یا آمدنی کے تخمینے سے کوئی براہ راست تعلق نہیں تھا۔ اس لیے جن افراد نے پہلے ہی گوشوارے جمع کرا دیے ہیں، ان سے ری فائلنگ یا ترمیم کا تقاضا نہیں کیا جائے گا۔

مزید وضاحت میں بتایا گیا کہ جائیداد کی مارکیٹ ویلیو کی تفصیل فراہم کرنا صوابدیدی عمل تھا، سوائے ان افراد کے جو پہلے ہی شق 7E کے تحت اس معلومات کے پابند تھے۔