ٹرمپ ایشیا کے دورے کے آخری مرحلے میں جنوبی کوریا پہنچ گئے

امریکی صدر ڈونلڈ ٹرمپ ایشیا کے دورے کے آخری مرحلے میں جنوبی کوریا پہنچ گئے ہیں، جہاں وہ صدر لی جائے میونگ سے ملاقات اور تجارتی معاہدے پر بات چیت کریں گے۔

جنوبی کوریا کے شہر بوسان پہنچنے پر ٹرمپ کا شاندار استقبال کیا گیا، جہاں فوجی بینڈ نے ان کے پسندیدہ گیت “YMCA” بجایا۔ بعد ازاں وہ ہیلی کاپٹر کے ذریعے گیونگجو روانہ ہوئے۔

President @realDonaldTrump lands in South Korea and is greeted with YMCA 🤣🇺🇸🇰🇷 pic.twitter.com/73PmeYdZ5G

— Margo Martin (@MargoMartin47) October 29, 2025

دونوں ممالک کے درمیان جولائی میں طے پانے والے 350 ارب ڈالر کی سرمایہ کاری کے معاہدے پر تاحال اختلافات برقرار ہیں۔ واشنگٹن چاہتا ہے کہ سیول اپنے دفاعی اخراجات میں اضافہ کرے، جبکہ کوریا امریکی امیگریشن قوانین میں نرمی چاہتا ہے تاکہ اپنی فیکٹریوں کے لیے افرادی قوت بڑھا سکے۔

ٹرمپ کل چینی صدر شی جن پنگ سے ملاقات کریں گے، جس سے عالمی منڈیوں میں پہلے ہی مثبت ردِعمل دیکھا جا رہا ہے۔

ٹرمپ کی ٹوکیو سے گیونگجو آمد شمالی کوریا کی جانب سے ایک ایٹمی صلاحیت والے کروز میزائل تجربے کے چند گھنٹے بعد ہوئی تاہم ٹرمپ نے اس تجربے کو اہمیت نہ دیتے ہوئے کہا کہ ان کی توجہ چین سے ہونے والے مذاکرات پر ہے۔

انہوں نے کہا کہ’’چین کے ساتھ ہمارے تعلقات بہترین ہیں، اور میرا خیال ہے کہ اس ملاقات سے نہ صرف امریکا بلکہ پوری دنیا کو فائدہ ہوگا‘‘۔

ٹرمپ نے اشارہ دیا کہ اگر بیجنگ فینٹانائل کیمیائی اجزا کی برآمدات میں کمی پر رضامند ہو جائے تو امریکا چینی مصنوعات پر عائد محصولات میں کمی کر سکتا ہے

ٹرمپ نے یہ بھی کہا کہ وہ شی جن پنگ سے تائیوان کے معاملے پر بات کرنے یا نہ کرنے کے بارے میں یقین سے کچھ نہیں کہہ سکتے۔ تائیوان کے وزیرِ خارجہ نے اس یقین کا اظہار کیا ہے کہ امریکا جزیرے کو ’’تنہا نہیں چھوڑے گا‘‘۔

ٹرمپ اس سے قبل ملائیشیا، تھائی لینڈ، کمبوڈیا اور جاپان کا دورہ مکمل کر چکے ہیں، جہاں انہوں نے نئے تجارتی معاہدوں اور علاقائی امن منصوبوں کا اعلان کیا۔