ویمنز ورلڈ کپ: جنوبی افریقا نے انگلینڈ کو 125 رنز سے شکست دے کر پہلی بار فائنل میں جگہ بنا لی

گوہاٹی میں کھیلے گئے آئی سی سی ویمنز ورلڈ کپ کے پہلے سیمی فائنل میں جنوبی افریقا نے شاندار کارکردگی کا مظاہرہ کرتے ہوئے انگلینڈ کو 125 رنز سے شکست دے دی اور ٹورنامنٹ کے فائنل میں پہلی بار رسائی حاصل کر لی۔

جنوبی افریقا کی کپتان لاؤرا ویل ورڈٹ نے زبردست بیٹنگ کرتے ہوئے 169 رنز کی شاندار اننگز کھیلی، جس کی بدولت ٹیم نے 7 وکٹوں کے نقصان پر 319 رنز بنائے۔

میچ کا آغاز جنوبی افریقی اوپنرز نے عمدگی سے کیا۔ کپتان لاؤرا ویل ورڈٹ اور تیزمین برٹس نے پہلی وکٹ کی شراکت میں 116 رنز جوڑے۔ تاہم 3 رنز کے اضافے سے ٹیم نے لگاتار 3 وکٹیں گنوا دیں۔

تیزمین برٹس نے 45 رنز، ماریزانے کیپ نے 42 رنز جبکہ کلوئی ٹریون نے 33 رنز کی اننگز کھیلی۔

انگلینڈ کو جیت کے لیے 320 رنز کا ہدف ملا لیکن آغاز انتہائی مایوس کن رہا۔ ابتدائی 3 بلے باز بغیر کوئی رن بنائے آؤٹ ہو گئیں۔

اس کے بعد کپتان نیٹ برنٹ اور الیس کیپسی نے چوتھی وکٹ کی شراکت میں 107 رنز جوڑے، مگر دونوں بیٹرز کے آؤٹ ہونے کے بعد ٹیم سنبھل نہ سکی۔

نیٹ برنٹ نے 64 رنز جبکہ الیس کیپسی نے 50 رنز بنائے۔ باقی ٹیم کوئی بڑی شراکت قائم نہ کرسکی اور انگلینڈ کی پوری ٹیم 43ویں اوور میں 194 رنز پر آؤٹ ہوگئی۔