کلاؤڈ فلیئر میں فنی خرابی کے باعث سوشل میڈیا پلیٹ فارمز سمیت متعدد ویب سائٹس متاثر

ویب ڈیسک: کلاؤڈ فلیئر سروسز میں اچانک تکنیکی خرابی کے باعث دنیا بھر میں کئی اہم ویب سائٹس متاثر ہوئی ہیں، جس کے نتیجے میں صارفین ایکس، اسپاٹی فائی اور کینوا سمیت دیگر پلیٹ فارمز تک رسائی سے محروم ہوگئے۔

تفصیلات کے مطابق دنیا بھر میں انٹرنیٹ کے بنیادی ڈھانچے کی سیکیورٹی کے لیے خدمات فراہم کرنے والی کمپنی کلاؤڈ فلیئر کی سروسز میں فنی خرابی کے باعث مختلف ویب سائٹس اور پلیٹ فارمز تک رسائی مشکل ہوگئی۔

رپورٹس کے مطابق منگل کو پاکستانی وقت کے مطابق شام ساڑھے چار بجے کے بعد صارفین کی جانب سے بڑی تعداد میں ویب سائٹس تک رسائی نہ ملنے کی شکایات سامنے آئیں، جن میں سوشل میڈیا پلیٹ فارمز اور دیگر اہم سروسز شامل ہیں۔

یعنی ویب سائٹس کے مواد کو تیزی سے ایک سے دوسری جگہ منتقل کرتی ہے اور اب اس کے سسٹم میں نامعلوم خرابی ہوئی ہے۔

کمپنی کی جانب سے جاری بیان میں بتایا گیا کہ ہم مسئلے سے آگاہ ہیں اور اس کے بارے میں جاننے کے لیے کام کر رہے ہیں۔

خیال رہے کہ کلاؤڈ فلیئر دنیا کی اہم ترین ویب سیکیورٹی اور نیٹ ورکنگ کمپنیوں میں شمار ہوتی ہے، جو ویب سائٹس کو سائبر حملوں سے بچانے، بھاری ٹریفک کے دوران انہیں فعال رکھنے اور دیگر اہم تکنیکی سہولیات فراہم کرتی ہے،کمپنی کا کہنا ہے کہ دنیا بھر کی 20 فیصد ویب سائٹس کسی نہ کسی شکل میں اس کی خدمات استعمال کرتی ہیں۔