امریکہ کو تیل تک مکمل رسائی ہونی چاہئے ورنہ دوسرا حملہ بھی کریں گے، ٹرمپ کی وینزویلا کو دھمکی

واشنگٹن ڈی سی : مریکی صدر ڈونلڈ ٹرمپ نے دھمکی دیتے ہوئے کہا ہے کہ امریکی کمپنیوں کو تیل تک مکمل رسائی ہونی چاہیے اور اگر وینرویلا نے درست رویہ اختیار نہ کیا تو امریکا دوبارہ حملہ کر دے گا۔

غیر ملکی میڈیا رپورٹس کے مطابق ائیرفورس ون میں صحافیوں سے گفتگو کرتے ہوئے صدر ٹرمپ نے کہا کہ امریکا کو وینزویلا میں تیل اور دیگر وسائل تک مکمل رسائی حاصل ہونی چاہئے، وینزویلا نے درست رویہ اختیار نہ کیا تو امریکا دوسرا حملہ بھی کرے گا۔

رپورٹس میں مزید بتایا گیا ہے کہ امریکی صدر نے وینزویلا میں اقتدار سنبھالنے والی نائب صدر ڈیلسی روڈریگز اور خطے کے دیگر ملکوں کو بھی دھمکیاں دیں اور کہا کہ ڈیلسی روڈریگز نے درست کام نہیں کیا تو مادورو سے بھی زیادہ بھاری قیمت چکانا پڑے گی۔

ٹرمپ نے کہا کہ  ڈیلسی روڈریگیز کو امریکی مطالبات ماننا ہوں گے ورنہ ان کو نتائج بھگتنا پڑ سکتے ہیں، وینزویلا ممکن ہے امریکی مداخلت کا آخری ملک نہ ہو، ہمیں گرین لینڈ کی ضرورت ہے، گرین لینڈ امریکی دفاع کیلئے ضروری ہے جو چینی اور روسی جہازوں سے گھرا ہوا ہے۔

کیوبا کے حوالے سے گفتگو کرتے ہوئے ان کا کہنا تھا کہ کیوبا کی حکومت بھی جلد خود ہی گرنے والی ہے، شاید فوجی مداخلت کی ضرورت نہ پڑے کیونکہ کیوبا کی آمدنی وینزویلا سے آتی تھی اور اب انہیں وہ بھی نہیں ملے گی، کولمبیا ایک بیمار شخص چلا رہا ہے جو کوکین بنانے اور اسے امریکہ فروخت کرنے میں دلچسپی رکھتا ہے لیکن وہ زیادہ عرصے تک ایسا نہیں کر پائے گا۔

ان کا مزید کہنا تھا کہ اسی طرح اگر میکسیکو نے اپنا نظام درست نہ کیا توامریکہ کو کچھ نہ کچھ کرنا ہوگا۔