بل گیٹس اور میلنڈا میں باضابطہ طلاق ہوگئی

تفصیلات کے مطابق دنیا کے سب سے بڑے مخیر جوڑے  بل گیٹس اور انکی اہلیہ ملینڈا گیٹس نے27 سال کے ساتھ کے بعد تین ماہ پہلے علیحدگی اختیار کی تھی، تاہم اب واشنگٹن کی کنگ کاؤنٹی کورٹ میں بل گیٹس اور میلنڈا نے طلاق کی دستاویز داخل کردی۔بل گیٹس اور میلنڈا  کی جانب سے   طلاق کی دستاویز میں تبدیلی نام کی درخواست نہیں کی  گئی اور نہ ہی بل گیٹس اور میلنڈا کے درمیان علیحدگی کا معاہدہ عدالت میں پیش  کیا گیا ہے ۔

خیال رہے کہ  تین ماہ قبل سماجی رابطے کی ویب سائٹ ٹوئٹر  پر  بل گیٹس اور میلنڈا گیٹس  نے ایک پیغام میں کہا تھا کہ ہمارا 27 سال کا سفر اختتام پذیر ہو گیا۔ ہم نے تین بچوں کو پرورش کی، مشترکہ فاؤنڈیشن بنائی جو کہ دنیا بھر میں لوگوں کو صحت مند اور تعمیری زندگی کی طرف لے جانے کے لئے کام کر رہی ہیں، رفاہی کاموں کے اس   مشن کو  جاری رکھنے کیلئے بل اینڈ ملینڈ گیٹس فاؤنڈیشن کیلئے مشترکہ کام جاری رکھیں گے تاہم میاں بیوی کی حیثیت سے ہم مزید اکٹھے نہیں رہ سکتے ۔ لہذا بے حد  سوچ  وبچار کے بعد ہم نے علیحدگی کا فیصلہ کیا ہے ۔

بل گیٹس دنیا کی امیر ترین شخصیات میں سے ایک  ہیں ، فوربز کے مطابق بل گیٹس دنیا کے امیر ترین افراد کی فہرست میں چوتھے نمبر پر ہیں جبکہ  ان کے  اثاثوں کی مالیت 124 ارب کے قریب ہے۔ بل گیٹس اورملینڈا کی پہلی ملاقات 1987 کے اواخر میں ہوئی تھی جب میلنڈا نے بل گیٹس کی کمپنی مائیکروسافٹ میں بطور پروڈکٹ مینجر ملازمت  کا آغاز کیا، دونوں نے 1994 میں ہوائی کے جزیرے لنائے  میں شادی کی جبکہ  ان کے تین بچے  بھی ہیں ۔

بل گیٹس اور ان کی اہلیہ ملینڈا گیٹس نے 2000ء میں مل کر خیراتی آرگنائزیشن ’بل اینڈ ملینڈا گیٹس فاؤنڈیشن کی بنیاد رکھی، اس وقت سے لے کر اب تک  یہ فاؤنڈیشن   خطیر رقم صحت، غربت کے خاتمے اور مختلف دیگر منصوبوں کے لئے خرچ کرچکی  ہے۔