خامیوں پر قابو پا کرمستقبل میں بہترین کھیل پیش کروں گا : ارشدندیم کا وطن واپسی پر شاندار استقبال

تفصیلات کے مطابق ٹوکیو اولمپکس کے جیولین مقابلے میں پاکستان کی نمائندگی کرنے والے  ایتھلیٹ  ارشد ندیم  وطن واپس پہنچ گئے ۔ پنجاب  کے وزیر برائے یوتھ اینڈ سپورٹس رائے تیمور خان بھٹی، ایتھلیٹکس فیڈریشن پاکستان کے صدر، کوچز اور کھلاڑیوں نے ایئرپورٹ پر ان کا استقبال کیاجبکہ مداحوں کی بڑی تعداد بھی لاہورایئر پورٹ پرموجود تھی ، مداحوں نے  قومی ایتھلیٹ ارشدندیم کےحق میں نعرےبازی بھی کی ۔

ائرپورٹ پر میڈیا سے گفتگو کرتے ہوئے ارشد ندیم نے کہاکہ پوری قوم کاشکرگزارہوں جنہوں نے میرے لئے دعا کی،   میڈیا کا شکرگزار ہوں جنہوں نے مجھے پوری دنیا میں مشہور کیا ، میں نےبہت محنت کی اور5ویں  نمبرپرآیا۔ انہوں نے کہاکہ پاکستان اسپورٹس بورڈ،پنجاب بورڈاورواپڈاکاشکرگزارہوں،میری جو سرپرستی کی گئی اس سے مطمئن  ہوں ،  مزیدمحنت کروں گا،قوم کومایوس نہیں کروں گا۔قومی ایتھلیٹ  نے مزید کہاکہ  حکومت سہولیات دے تا کہ وہ 2024 اولمپکس کی تیاریاں شروع کردیں۔

پاکستان پہنچنے کے بعد  ان کا قافلہ اوکاڑہ سے میاں چنوں پہنچا جہاں انہوں نے اپنے والد اور بھائیوں کے ساتھ استاد رشید ساقی سے ملاقات کی۔ ارشد ندیم پر پھولوں کی پتیاں نچھاور کی گئیں اور ڈھول کی تھاپ پر رقص بھی کیا گیا اور ارشد ندیم کو پھولوں کے ہار پہنائے گئے۔

واضح رہے کہ ارشدندیم نےاولمپکس کےجیولن تھرومقابلوں میں5ویں پوزیشن حاصل کی ہے ۔