رات بھر نیند نہ آنے سے پریشان افراد، یہ غذائیں استعمال کریں

موجودہ دور میں بہترین   نیندکسی نعمت سے کم نہیں ، مصروف زندگی ،تناؤ اور دیگر مسائل کے باعث نیند  کا حصول ایک مشکل بن گیا ہے، دن کا زیادہ تر وقت اسکرینز کا استعمال جہاں  ہماری نیند کو بے حد متاثر کرتا ہے  وہیں  کام اورذہنی  الجھنیں بھی اچھی نیند آنے میں رکاوٹ بنتی ہیں۔

ماہرین طب کا کہنا ہے کہ ہم نیند کی کمی کا شکار اس وقت ہوتے ہیں جب ہمارے اعصاب پرسکون نہیں ہوپاتے۔ پرسکون اعصاب ہی اچھی نیند لانے کا سبب بنتے ہیں اور اعصاب کو پرسکون رکھنے کے لیے دماغی و جسمانی ورزشیں اور ہلکی پھلکی غذائیں استعمال کی جاسکتی ہیں۔

ماہرین کا کہنا ہے کہ اگر یہ غذائیں شام یا رات سونے سے قبل استعمال کرلی جائیں تو آپ ایک اچھی اور بھرپور نیند سو سکتے ہیں۔

اخروٹ میں موجود مائنو ایسڈ دماغ میں سیروٹنن اور میلاٹونین نامی مادہ پیدا کرتا ہے جو ہمارے دماغ کو پرسکون بنا کر بہترین نیند لانے میں معاون ثابت ہوتا ہے۔ماہرین کا کہنا ہے کہ نیند لانے والی بعض دواؤں میں مصنوعی طور پر میلاٹونن کی آمیزش کی جاتی ہے۔ لہٰذا ان دواؤں سے بہتر میلاٹونن کا قدرتی ذخیرہ ہے جو اخروٹ کی شکل میں باآسانی دستیاب اور صحت بخش ہے۔

اسی طرح بادام میں موجود میگنیشیئم دماغی تناؤ کو کم اور سر درد کا علاج کرتا ہے۔ یہ دراصل دماغ اور اعصاب کو پرسکون کرتا ہے۔ یہی نہیں روزانہ بادام کھانا دماغی کارکردگی اور استعداد میں بھی اضافہ کرتا ہے۔

اگر آپ رات میں بہترین نیند سونا چاہتے ہیں تو شام میں شکر قندی کھائیں۔ یہ نہ صرف ذائقہ دار ہے بلکہ اس میں موجود کاربوہائیڈریٹس اور وٹامن بی 6 معدے کی تیزابیت کو ختم کرتے ہیں جو کہ نیند کی کمی کی وجہ بنتی ہے ۔

رات سونے سے قبل ایک گلاس نیم گرم دودھ پینے کے بعد آپ بستر پر لیٹتے ہی نیند کی  وادیوں میں کھو جائیں گے ۔  دودھ بلکہ وہ تمام غذائیں جن میں کیلشیئم موجود ہو جیسے دہی یا پنیر وغیرہ نیند لانے میں معاون ثابت ہوتی ہیں۔البتہ ان کے استعمال سے قبل وقت اور موسم کو ضرور مدنظر رکھنا چاہئیے ۔ صرف نیم گرم دودھ ہر موسم میں استعمال کیا جاسکتا ہے۔

پھلوں میں کیلا وہ پھل ہے جس  میں پوٹاشیئم اور میگنیشیئم وافر مقدار میں موجود ہوتے ہیں جو اعصاب اور پٹھوں کو آرام دہ اور ہلکا پھلکا کرتے ہیں جس کے بعد آپ ایک پرسکون نیند سو سکتے ہیں ۔