اسلام آباد: سائنو فارم اور موڈرنا سٹاک کی قلت، ویکسی نیشن کا عمل معطل

جی  این  این کے مطابق نیشنل کمانڈ اینڈ آپریشن سنٹر (این سی او سی) کا کہنا ہے کہ پہلی خوراک لگانے کا عمل سٹاک کی قلت کی وجہ سے روکا کیا گیا ہے ، اس سے پہلے بھی تمام صوبوں کو پہلی خوراک روکنے کی ہدایات جاری کی گئیں۔ صوبوں کی جانب سے پہلی خوراک روکنے کی ہدایات پر عمل درآمد یقینی نہیں بنایا گیا۔ ابھی بھی سائنو فارم اور موڈرنا کی بڑی تعداد بطور پہلی خوراک لگائی جارہی ہے۔

این سی او سی کے مطابق پہلی خوراک لگانے سے دوسری ڈوز لگوانے والوں کو مستقبل میں مشکلات کا سامنا ہوسکتا ہے، دوسری ڈوز کے لیے سٹاک کی قلت سے قومی ویکسین مہم بھی متاثر ہوسکتی ہے، این سی او سی کی جانب سے پہلی ڈوز روکنے کے احکامات پر سختی سے عمل درآمد پر زوردیا گیا ہے ۔

واضح رہے کہ ملک میں کورونا وائرس کی  چوتھی  لہر کے دوران  مزید 84 افراد انتقال کر گئے جبکہ 4062کیسز رپورٹ ہوئے ہیں۔ نیشنل کمانڈ اینڈ آپریشن سینٹر کی جانب سے جاری کیے گئے تازہ اعداد و شمارکے مطابق  ملک میں  اموات کی مجموعی تعداد26ہزار497ہوگئی ہے،جبکہ  متاثرہ افراد کی مجموعی تعداد 11لاکھ94ہزار198ہوگئی ہے ۔