پی ایس ایل 6میں آج دو میچوں میں دھواں دار مقابلے متوقع

تفصیلات کے مطابق شہر قائد میں آج پھر چوکوں چھکوں کی برسات ہوگی ، نیشنل اسٹیڈیم کراچی میں پہلا میدان دوپہر دو بجے سجے گا، لاہور قلندرز اور پشاور زلمی کی ٹیموں کا آمنا سامنا ہو گا۔دونوں ٹیموں کے درمیان کانٹ دار جوڑ پڑے گا۔ کھلاڑیوں کی بات کی جائے تو وکٹ کیپر بلے باز کامران اکمل پشاور زلمی کی بیٹنگ لائن کا ستون ہیں،وہ سپر لیگ میں ابھی تک سب سے زیادہ رنز بنانے والوں میں پہلے نمبر پر موجود ہیں۔ انہوں نے تین سنچریاں بھی بنا رکھی ہیں۔ دوسری طرف لاہور لاہور قلندرز کے تجربہ کار بیٹسمین محمد حفیظ بھی بھرپور فارم میں ہیں،پروفیسر کا بلا چک گیا تو روکنا مشکل ہوگا۔ 

آج کا دوسرا میچ ملتان سلطانز اور دو بار کے چیمپئن اسلام آباد یونائیٹڈ کے درمیان شام سات بجے ہو گا۔کپتان شاداب خان اور محمد رضوان کو اپنی پرفارمنس اور ٹیم پر مان، ایونٹ کے دوسرے روز چاروں ٹیموں کے جیت کے جذبے نے کرکٹ دیوانوں کو جوشیلا کر دیا۔ دونوں کپتان سمیت کھلاڑی پرجوش ہیں۔  

یاد رہے گزشتہ روز پاکستان سپر لیگ 6 کے افتتاحی میچ میں دفاعی چیمپیئن کراچی کنگز نے کوئٹہ گلیڈی ایٹرز کو 7 وکٹوں سے شکست دے دی۔نیشنل اسٹیڈیم کراچی میں کھیلے گئے میچ میں کنگز نے گلیڈی ایٹرز کی جانب سے دیا گیا 122 رنز کا ہدف باآسانی 13 ویں اوور میں حاصل کر لیا۔کنگز کی جانب سے کلارک 46, محمد نبی 30 اور بابر اعظم 24 رنز بنا کر نمایاں رہے۔