لاہور : پبلک ٹرانسپورٹ میں سفر کرنے کیلئے ویکسی نیشن لازمی قرار 

جی این این کے مطابق  صوبائی دارالحکومت  لاہور کے ماس ٹرانزٹ سسٹم میں سفر کرنے کے لیے نئی ہدایات دے دیں گئیں , جس کے تحت میٹرو بس اور اورنج ٹرین میں سفر کرنے کے لیے ویکسینیشن کروانا ضروری ہوگا  ۔ ماس ٹرانزٹ اتھارٹی نے کورونا ایس او پیز پر عمل کرنے کے لیے نئی ڈیڈ لائن دے دی۔  ویکسی نیشن نہ کروانے والے مسافر یکم اکتوبر سے میٹرو بس، میٹرو ٹرین اور سپیڈو بسوں پر سفر نہیں کر سکیں گے۔

 یکم اکتوبر 2021 سے مکمل ویکسین یا پہلی خوراک لگوانے والوں کو سفر کرنے کی اجازت ہوگی جبکہ یکم اکتوبر سے نادرا سرٹیفیکیٹ کے بغیر سفر کرنے کی اجازت نہیں ہوگی ۔ یکم نومبر 2021 سے صرف وہ لوگ سفر کر سکیں جنہوں نے ویکسین کی  مکمل ڈوز لگوائی ہوگی  اور مکمل ڈوز اور کورونا سرٹیفکیٹ نہ ہونے کی صورت میں سفر کرنے کی اجازت نہیں ہوگی ۔  بس اور ٹرین میں ٹکٹ کاؤنٹر پر کورونا ویکسینیشن سرٹیفکیٹ  بھی چیک کیا جائے گا۔

دوسری جانب پنجاب  میں کورونا کے پھیلاؤ کے پیش نظر 5 اضلاع میں سمارٹ لاک ڈاؤن لگا دیا گیا ہے۔

واضح رہے کہ پنجاب میں کورونا مریضوں کی تعداد 4لاکھ20ہزار 615ہوگئی ۔ جبکہ صوبے میں اب تک 12ہزار 365افراد جان سے ہاتھ دھو بیٹھے ہیں ۔