سعودی عرب میں شادی ہالز اور گیسٹ ہاؤسز کے لیے کورونا پابندیوں میں نرمی

جدہ : سعودی عرب میں شادی ہالز اور گیسٹ ہاؤسز کے لیے کورونا پابندیوں میں نرمی کی گئی ہے۔

عرب میڈیا کی رپورٹ کے مطابق سعودی وزارت بلدیات و دیہی و آباد کاری امور نے شادی ہالز، تقریبات ہالز، استراحات (گیسٹ ہاؤسز) میں مہمانوں اور کارکنان کے لیے کورونا وائرس سے متعلق ضوابط میں ترمیم کی۔

رپورٹ میں بتایا گیا کہ مذکورہ مقامات پر سماجی فاصلہ ختم کردیا گیا ہے جبکہ پوری گنجائش کے ساتھ شادی گھر، تقریبات ہال اور استراحات استعمال کیے جاسکتے ہیں۔

سعودی حکام نے زور دیا ہے کہ ان مقامات پر مکمل ویکسینیشن کروانے والوں کو ہی داخل ہونے کی اجازت دی جائے گی، دعوت نامے جاری کرنے والے کو یہ اقرار نامہ پیش کرنا ہوگا کہ تمام مہمان صحت ضوابط کی پابندی کریں گے۔

توکلنا ایپ کے ذریعے ویکسین ریکارڈ بھی گیٹ پر چیک کیا جائے۔ انہی مہمانوں کو داخلے کی اجازت ہوگی جن کا توکلنا میں ہیلتھ ریکارڈ ’محصن‘ (ویکسین یافتہ) نظر آئے گا۔

اسی طرح عملے اور مہمانوں کو ماسک کی پابندی کرنا ہوگی۔ ضروری ہوگا کہ کوئی کسی سے مصافحہ نہ کرے۔ ڈائننگ ہالز میں ایسے برتن اور کپس رکھے جائیں جو کھانے پینے میں ایک بار استعمال ہوتے ہوں۔