کراچی :  سندھ بار کونسل سیکرٹری قاتلانہ حملے میں جاں بحق

تفصیلات کے مطابق عرفان مہر کی گاڑی پر فائرنگ کا واقعہ گلستان جوہر بلاک 13 میں پیش آیا ، 40سالہ  عرفان مہرصبح   بچوں کو  کار میں سکول چھوڑنے جارہے تھے کہ نامعلوم افراد کی جانب سے انہیں  گولیوں کا نشانہ بنایا گیا ، ہیلمٹ پہنے موٹرسائیکل  سواروں نے بے حد قریب سے ان پر فائرنگ کی اور فرار ہو گئے۔ ریسکیو کے مطابق عرفان علی مہر کو اسپتال منتقل کیا جا رہا تھا کہ وہ راستے میں ہی دم توڑ گئے۔

ایس ایس پی ایسٹ قمر رضا جسکانی  کے مطابق مقتول عرفان مہر کو بظاہر جسم پر 3 گولیاں لگی ہیں ،  پولیس کو جائے وقوع سے 30 بور پستول کے 3 خول ملے ہیں، گاڑی میں مقتول عرفان مہر کے ہمراہ ان کا بھتیجا بھی موجود تھا جو معجزانہ طور پرمحفوظ رہا ۔

گلستان جوہر میں فائرنگ سے وکیل کی ہلاکت کے واقعے کی سی سی ٹی وی بھی پولیس کو موصول ہو گئی ہے، ویڈیو میں ملزمان کو ہیلمٹ پہنے دیکھا جا سکتا ہے اور ملزم کو گاڑی پر فائرنگ کرتے بھی دیکھا جا سکتا ہے۔

پولیس کے مطابق واقعے کی سی سی ٹی وی فوٹیج  سے واردات کے  مختلف پہلوؤں  کا  جائزہ لے رہے ہیں۔

چیئرمین ایگزیکیٹیو سندھ بار کونسل عارف داؤد کے مطابق مقتول کی نماز جنازہ چار بجے بعد نماز عصر بیت المکرم مسجد میں ادا کی جائے گی، عرفان کے اہل خانہ نے تدفین آبائی علاقے  گڑھی یاسین  کا فیصلہ کیا ہے۔