پنجاب اور سندھ کے میدانی علاقے دھند کی لپیٹ میں آگئے

پنجاب میں اسموگ کے ساتھ ساتھ دھند کی انٹری بھی ہوگئی ، موٹروے پولیس کے مطابق موٹروے M-1 کا رشکی سے صوابی کا حصہ اب کھول دیا گیا ہے، اس سیکشن پر دھند کی شدت میں کمی آئی ہے۔موٹر وے پولیس کی جانب سے ڈرائیورز کو سفر کے دوران احتیاط کی ہدایت کی گئی ہے۔

موٹروے پولیس کاکہنا ہے کہ گاڑیوں میں فوگ لائٹس  کا استعمال کریں ، دھند کے موسم میں گاڑیوں میں درمیانی فاصلہ عام حالات کی نسبت زیادہ رکھیں ۔ 

دھند کے باعث  شہر کے داخلی و خارجی راستوں پر وارڈنز کی نفری میں اضافہ کردیا گیا ۔بابو صابو، ٹھوکرنیاز بیگ ، شاہدرہ چوک، پرانے راوی پل پر وارڈنز کی نفری بڑھا دی گئی، دھند کے باعث شہر کے داخلی و خارجی راستوں پر غیر معمولی ٹریفک کا لوڈ رہنے کا امکان  ہے ۔ 

ایئرکوالٹی انڈیکس کے مطابق اب سے کچھ دیر پہلے تک اسموگ کے باعث نئی دلی ایک بار پھر دنیا کے آلودہ ترین شہروں میں پہلے اور لاہور دوسرے نمبر پر ہے۔

ایئر کوالٹی انڈیکس کے مطابق آلودہ فضا کے اعتبار سے پاکستان میں بہاولپور پہلے اور کراچی نویں نمبر پر موجود ہے۔

ماہرین صحت کا کہنا ہے کہ آلودہ فضا کےباعث ملک کے مختلف شہروں میں ناک کان اور حلق کے امراض میں اضافہ ہو رہاہے۔ 

دوسری جانب محکمہ موسمیات کے مطابق آج ملک بھر میں موسم خشک رہنے کا امکان ہے۔ آئندہ چوبیس گھنٹے میں ملک کے بالائی علاقوں میں موسم شدید سرد رہے گا۔ گلگت بلتستان میں سکردو، استور، گلگت اور ہنزہ میں درجہ حرارت نقطہ انجماد سے بھی نیچے رہنے کی توقع ہے۔

محکمہ موسمیات کے مطابق پنجاب کے میدانی علاقوں میں دھند اور اسموگ چھائی رہنے کا امکان ہے۔ بلوچستان میں قلات اور کوئٹہ میں موسم شدید سرد رہنےکی پیشگوئی ہے۔