پنجاب جین سیکونسنگ مشین خریدنے والا پہلا صوبہ بن گیا

(رپورٹ :ذوالقرنین رانا )

صوبائی   محکمہ صحت کے مطابق جین سیکونسنگ مشین آئندہ ہفتے کے اختتام تک کام شروع کر دے گی، اس  مشین کی مدد سے پنجاب میں کورونا وائرس کی اقسام  کی تشخیص  کی جا سکے گی ۔   وزیر اعلیٰ پنجاب  سردار عثمان بزدار کی  ہدایت پر  کابینہ کمیٹی برائے انسداد کورونا وائرس نے 5 کروڑ کے فنڈ  کی منظوری دی تھی ۔

 پنجاب کورونا وائرس کی جین سیکونسنگ کی سہولت والا پہلا صوبہ  بن  گیا ہے،  اس سے قبل  جین سیکونسنگ کی مشین صرف وفاقی ادارہ صحت کے پاس تھی ۔ مریضوں کی موت کورونا کی کس قسم سے ہورہی ہے اور وائرس کس حد تک مہلک ہے،  مشین کی خریداری سے  اس سلسلے میں بھی تحقیق کی جاسکے گی ۔

نیشنل کمانڈ سنٹر کی جانب سے جاری اعدادوشمار کے مطابق  پنجاب  بھر میں کورونا مریضوں کی تعداد د 1 لاکھ 55ہزار805 ہوگئی ہے  ۔ جبکہ صوبے میں اب تک 4 ہزار661 افراد جان سے ہاتھ دھو بیٹھے ہیں ۔ پنجاب  میں کورونا کے مثبت کیسز کی  شرح 3.85فیصد، راولپنڈی میں شرح2.44، لاہور میں5.46فیصد ، فیصل آبادمیں مثبت کوروناکیسزکی شرح3.83،ملتان میں1.49 فیصد ، گوجرانوالہ میں شرح1.79، بہاولپورمیں5.34فیصد ہے۔

حکومت پنجاب نے کورونا کے بڑھتے کیسز کے پیش نظرلاہور،گوجرانوالہ،حا فظ آباداورگجرات کے مزید علاقوں میں سمارٹ لاک ڈاؤن نافذ کر دیا۔ لاہور کے 16،گوجرانوالہ، گجرات 1,1اور حافظ آباد کے مزید 3علاقوں میں سمارٹ لاک ڈاؤن لگا یا گیا ہے ۔