لیجنڈ گلوکارہ نیرہ نور انتقال کرگئیں

گلوکارہ کے خاندانی ذرائع کے مطابق وہ پچھلے چند روز سے بیمار تھیں اور کراچی میں ہی زیرعلاج تھیں، ان کی نماز جنازہ آج سہہ پہر 4 بجے مسجد و امام بارگاہ یثرب ڈیفنس کراچی میں ادا کی جائےگی جبکہ  تدفین ڈیفنس فیز 8 کے قبرستان میں کی ہوگی۔

نیرہ نور 3 نومبر 1950ء کو بھارتی ریاست آسام کے شہر گوہاٹی میں پیدا ہوئیں جو قیام پاکستان کے بعد خاندان کے ہمراہ پاکستان منتقل ہو کر  کراچی میں مقیم ہو گئیں۔

وزیر اعظم شہباز شریف نے نیرہ نور کے انتقال پر گہرے رنج کا اظہار کرتے ہوئے کہا کہ نامور گلوکارہ نیرہ نور کا انتقال موسیقی کی دنیا کے لیے ایک نا قابل تلافی نقصان ہے۔

انہوں نے کہا کہ نیرہ نور اپنی آواز میں ترنم اور سوز کی وجہ سے خاص پہچان رکھتی تھیں، غزل ہو یا گیت جو بھی انہوں نے گایا کمال گایا۔ان کی وفات سے پیدا ہونے والا خلا کبھی پُر نہیں ہوگا۔ 

اسپیکر قومی اسمبلی راجہ پرویز اشرف نے کہا کہ نیرہ نور اپنی پُر سوز آواز کی بدولت موسیقی کی دنیا میں منفرد مقام رکھتی تھیں, ان کا انتقال موسیقی کی دنیا کے لیے بڑا نقصان ہے۔ ان کے انتقال سے پیدا ہونے والا خلا مدتوں پُر نہیں ہوسکے گا۔